एजेन्सी । अमेरिकी सभामुख न्यान्सी पलोसी गरेको ताइवान भ्रमण विशुद्ध उत्तेजनात्मक गतिविधि भएको रुसले बताएको छ । मंगलबार रुसका राष्ट्रपतिका प्रवक्ता दिमित्री पेस्कोभले वाशिङटनसँग बेइजिङको विवादमा मस्कोले बेइजिङलाई पूर्ण समर्थन गर्ने बताए ।
‘हामी चीनसँग पूर्ण ऐक्यबद्धता व्यक्त गर्छौं,’ पेस्कोभले बताए, ‘त्यस विषयमा चीनको संवेदनशीलतालाई बुझ्न सकिन्छ । त्यो जायज छ । अनि त्यसलाई सम्मान गर्नुको साटो अमेरिकाले भिडन्तको बाटो रोजेको छ । यसले सुखद भविष्यको संकेत गर्दैन । वाशिङटनको निर्णय निन्दनीय छ ।’
ताइवानका विषयमा चीन र अमेरिकाबीच तनाव बढेर युद्ध भएमा रुसले आफ्नो सीमा रक्षाका लागि आफ्नै सैनिक खटाउने पनि उनले जानकारी दिए । उत्तेजनात्मक परिस्थिति उब्जिए पनि आफ्नो सम्पूर्ण सीमाको सुरक्षा आफ्नै सेनाले गर्ने उनले दाबी गरे ।
