२०८३, श्रावण १० गते
- यो साता चर्चामा :
काठमाडौं । नेपालका लागि अमेरिकी राजदूत र्यान्डी बेरीले नेपालमा कोरोना भाइरस (कोभिड –१९) संक्रमितको संख्या निरन्तर बढ्दै गएकाले सबैजना सचेत र जिम्मेवार हुन जरुरी रहेको बताएका छन् । आज ट्विट गर्दै उनले महामारीको यो घडीमा आफू र आफ्ना परिवार तथा आफन्तको ख्याल राख्न सबैलाई अनुरोध गरेका छन् ।
नेपाली भाषामा ट्विट गर्दै राजदूत बेरीले सकेसम्म घरमै बस्न र आवश्यक कामका लागि बाहिर निस्कँदा अनिवार्य मास्क लगाउन आग्रह गरेका छन् ।
साथै, उनले सामाजिक दूरी कायम गर्न र भीडभाडमा नजान पनि सबैलाई आग्रह गरेका छन् ।
‘कृपया सबैजना मास्क लगाउनुहोस् र सकेसम्म घरमै बस्नुहोस् । सामाजिक दूरी (कम्तीमा २ मिटरको) कायम गर्नुहोस्, राम्रो भेन्टिलेसन नभएका र भीडभाडमा नजानुहोस्’, राजदूत बेरीले लेखेका छन्, ‘नेपालमा कोभिड –१९ को संख्या निरन्तर बढ्दै गएको अवस्थामा हामी सबैले जिम्मेवार हुन अति जरूरी छ । आफू र आफन्तहरूको ख्याल राख्नुहोस् ।’
उनले एकान्तमा रहेर मास्क लगाएको तस्बिर पोस्ट गर्दै यस्तो आव्हान गरेका हुन् ।
