काठमाडौं। मुलुकको संवेदनशील मध्येको चिकित्सा क्षेत्र यतिबेला आन्दोलित बनेको छ । बिरामी र उनका आफन्तहरुबाट असुरक्षा बढेको भन्दै चिकित्सकहरु आन्दोलित बनेका छन् । केही समय अगाडि मकवानपुरको सञ्चो अस्पताल, नेपालगञ्ज मेडिकल कलेज, पोखराको मणिपाल र पाटन अस्पतालमा स्वास्थ्यकर्मीहरुमाथि भएको दुव्र्यवहारको विरुद्ध चिकित्सक आक्रोशित बनेका हुन् ।

उनीहरुले आफ्नो सुरक्षाको ग्यारेण्टी स्वयं अस्पताल र सरकारले गर्नुपर्ने भन्दै आक्रमणकारीहरुलाई कडा सजायको माग गरेका छन् ।चिकित्सकहरुमाथि हातपात र ढुंगामुढा भइरहँदा राज्यका सुरक्षा संयन्त्र मुखदर्शक बन्ने गरेको उनीहरुको आरोप छ । मणिपालको घटनालाई लिएर गृहमन्त्री नारायणकाजी श्रेष्ठले आक्रमणकारीविरुद्ध मुद्धा चलाउन निर्देशन दिएपनि चिकित्सकहरु विश्वस्त भइसकेका छैनन् ।

सबैभन्दा बढी आक्रमण हुने र असुरक्षित पेशा स्वाथ्यकर्मीहरुको बन्दै गएको उनीहरुको ठहर छ । वरिष्ठ चिकित्सक डा. भोला रिजालले राजनीतिक पहुँचबाट टाढा, सुरक्षाविहीन स्वास्थ्यकर्मीहरुमाथि सबैले आक्रमण गरेको प्रति दुःख व्यक्त गर्नुभयो ।

आक्रोशित चिकित्सकहरुको भिडले आफूहरुलाई बन्दुकको व्यवस्था गर्नुपर्ने बताएका छन् । निरन्तरको आक्रमणले आजित भएको भन्दै उनीहरुले सुरक्षाको ग्यारेण्टी नहुञ्जेल आन्दोलन नरोकिने चेतावनी दिएका छन् । नेपाल चिकित्सक संघका पूर्व उपाध्यक्ष डा. ढुण्डीराज पौडेलले स्वास्थ्यकर्मीहरुमाथि भइरहेको प्रहारले उनीहरु ठूलो दबाबमा परेको बताउनुभयो । सीमा नाघेपछि मात्रै चिकित्सक आवेशमा आएको पौडेलको भनाइ छ ।

स्वास्थ्यकर्मीहरूले स्वास्थ्यकर्मी तथा स्वास्थ्य संस्थाको सुरक्षासम्बन्धी पहिलो संशोधन ऐन, २०७९ अविलम्ब कार्यान्वयनको माग राखेका छन् । दोषीलाई संरक्षण गर्न नहुने र चिकित्सकमाथि बारम्बार आक्रमण हुँदा समेत राज्य मुकदर्शक बन्न नहुने उनीहरुको भनाइ छ । स्वास्थ्य विश्लेषक सुवास प्याकुरेलले विभिन्न देशमा यस्ता घटना भइरहने बताउँदै नेपालमा नीति र पर्याप्त छलफलको खाँचो रहेको बताउनुभयो ।

कानुनीराज्य भएको भए घटना भएलगत्तै पक्राउ परी जेलमा जानुपर्ने बताउँदै उनीहरुले घटना दोहोरिँदा पनि कारबाही नभएकोप्रति दुख प्रकट गरेका छन् । पटकपटकको चिकित्सक र नागरिक विवादप्रति राज्य संवेदनशील हुन जरुरी रहेको देखिन्छ । स्वास्थ्यकर्मीको आचरण, व्यवहार, अस्पतालको लापरवाही र नागरिक उदण्डतालाई एकै ठाउँमा राखेर बहस गर्नुपर्ने देखिएको छ ।