काठमाडौं । नेपाली कांग्रेसकी केन्द्रीय सदस्य डा डिला संग्रौलाले संसद्मा प्रत्यक्ष तर्फबाट निर्वाचित महिलाको संख्या बढाउनका लागि निर्वाचन क्षेत्र नै आरक्षित गर्नुपर्ने प्रस्ताव गर्नु भएको छ । हिजोदेखि सुरु भएको कांग्रेस केन्द्रीय समितिको बैठकमा आज बोल्दै उहाँले महिलालाई प्रत्यक्ष चुनावमा प्रतिस्पर्धा गर्ने वातावरण बनाउँदा महिलाको योग्यता र क्षमता पनि जनताले देख्ने उल्लेख गर्नुभयो ।
उहाँले महिलाहरूलाई समानुपातिक तर्फबाट मात्र सांसद बनाउँदा महिलाहरूले प्रत्यक्षमा प्रतिस्पर्धा गर्न नचाहेको भन्ने गलत सन्देश गएको बताउनुभयो ।
पूर्व सांसद समेत रहनु भएकी डा संग्रौलाले निर्वाचन प्रणालीको सुधार गर्ने बहस चलिरहेका बेला महिलाको मुद्दालाई कांग्रेसले विशेष ख्याल गर्नुपर्नेमा जोड दिनुभयो ।
शिक्षकहरूको मागलाई विश्लेषण गरेर सम्बोधनका उपायहरू अवलम्बन गर्न कांग्रेसले नेतृत्वदायी भूमिका खेल्नु पर्ने उहाँको भनाई थियो । लाखौँ विद्यार्थीहरूको पढाइमा प्रत्यक्ष असर परिरहेकाले यस विषयमा चाडै समाधान निकाल्न पार्टीले योगदान गर्नुपर्नेमा समेत उहाँले जोड दिनुभयो ।
