काठमाडौं । नेकपा एमालेको लुम्बिनी प्रदेश अधिवेशनको मतगणना सुरु भएको छ । प्रदेश कमिटीको नयाँ नेतृत्वका लागि भएको निर्वाचन अन्तर्गत मतगणना सुरु भएको हो ।
प्रदेश कमिटीको अध्यक्षका लागि वर्तमान अध्यक्ष राधाकृष्ण कँडेल र केन्द्रीय सदस्य हरि रिजाल प्रतिस्पर्धामा छन् । पदाधिकारी र सदस्य गरी २०५ जनाको प्रदेश कमिटीका लागि ३६४ जना चुनावी प्रतिस्पर्धामा उत्रिएका थिए । मंगलबार(आज) बिहान पौने ९ देखी सुरु भएको मतदान दिउँसो ३ बजे सकिएको थियो । कुल एक हजार पाँच मतदाता मध्ये ९६५ जनाको मत खसेको थियो ।
उपाध्यक्षमा भोजप्रसाद श्रेष्ठ, विश्वराज बराल र पूजन विश्वकर्माले उम्मेदवारी दिनुभएको छ। उपसचिव खुलामा ४ र महिलामा ३ जनाको उम्मेदवारी परेको छ । सचिवमा भने लक्ष्मण आचार्य निर्विरोध निर्वाचित भइसक्नुभएको छ।
मुख्य निर्वाचन अधिकृत हरिप्रसाद भण्डारीका अनुसार आजै गणना सकेर रातिसम्म मतपरिणाम सार्वजनिक गर्ने तयारी छ।
