काठमाडौँ । नेपाली काँग्रेसका लोकप्रिय नेता तथा सांसद डा। चन्द्र भण्डारीको आज फेरि शल्यक्रिया गरिने भएको छ । झण्डै ६ महिना अगाडि आगलागीमा परी घाइते हुनुभएका भण्डारीको आज कृतिपुरस्थीत बर्न सेन्टरमा शल्यक्रिया हुन लागेको अस्पतालका प्रमुख प्रा. डा. शंकर राईले जानकारी दिनुभयो ।

डा भण्डारीको हात र पछाडीको भागको शल्यक्रिया गर्न लागिएको हो । पुर्वनिधारित उपचार प्रक्रिया अनुसार नै उहाँको शल्यक्रिया गर्न लागिएको अस्पतालले जनाएको छ ।

उहाँको शल्यक्रियाका लागि क्यानडाबाट अमेरिकीमुलका चिकित्सक डा. तिमोथी स्प्रौल समेत आउनु भएको डा. राईले बताउनु भयो । नेता भण्डारीले आफ्नो उपचारका लागि राज्यले दिएको रकम पनि फिर्ता गर्ने घोषणा गरेकोले क्यानडाका चिकित्सक आफ्नै खर्चमा भण्डारीको शल्यक्रिया गर्न आउनु भएको डा राईले जानकारी दिनुभयो ।

गत फागुन ३ गते राती आगलागीमा पर्नु भएका भण्डारीको सुरुमा कृतिपुर वर्न सेनटरमै उपचार गरी थप उपचार भारतको मुम्बईमा रहेको नेश्नल बर्न सेन्टरमा गराइएको थियो । भारतमा ७३ दिन उपचार गराएर फर्किएपछि उहाँको गत बैशाख १९ गतेदेखि काठमाडौको पुरानो वानेश्वरमा रहेको फ्रन्टलाईन अस्पतालमा उपचार भइरहेको थियो ।

कृतिपुर वर्न अस्पतालका प्रमुख डा। शंकर राईसँग परामर्श र निगरानीमा नै उहाँलाई फ्रन्टलाईनमा उपचार गराइएको थियो । अस्पतालमा उहाँलाई फिजियो थेरामी, ड्रेसिङ लगायतका उपचार गराइएको थियो ।

उहाँको उपचारका लागि अस्पतालले पनि शुल्क नलिने घोषणा गरेको थियो । राज्यले दिएको रकम फिर्ता दिएकाले उहाँलाई सहयोग गर्न चाहनेहरु झन बढेको उहाँका निकटस्थहरुले बताएका छन् ।