काठमाडौं । नेपालका सांसद डा चन्द्र भण्डारीको अभिव्यक्ति र अवधारणालाई भारतका प्रधानमन्त्री नरेन्द्र मोदीले पछ्याउनु भएको छ ।
कांग्रेस सांसद भण्डारीले संसदमा सम्वोधन गर्दा दिएको अभिव्यक्तिलाई भारतका प्रधानमन्त्री मोदीले पनि संसदमै सम्बोधन गर्नेक्रममा पछ्याउनु भएको हो ।
आगलागीपछि घाइते हुनुभएका भण्डारीले भारतमा साढे दुई महिना उपचार गरी फर्किएपछि गत जेठ १० गते संसदमा पहिलो पटक सम्बोधन गर्नेक्रममा अब नेपालमा रिफर्म, पर्फम र ट्रन्सफर्मको आवश्यकता रहेको बताउनु भएको थियो ।
उहाँले भन्नु भएको थियो, “यो मुलुकलाई रिफर्मको आवश्यकता छ, तब मात्र योग्य मान्छेबाट पर्फम देखाउन सकिन्छ, अनि मात्र मुलुकको ट्रान्सफर्म हुन्छ र विश्वको रङ्गमञ्चमा नेपालको पहिचान हुन्छ ।” उहाँले यो अभिव्यक्ति प्रधानमन्त्री पुष्पकमल दाहाल लगायत शिर्ष नेताहरु उपस्थीत भएकै बेला संसदमा राख्नु भएको हो ।
ठ्याक्कै यही कुरा झण्डै साढे दुई महिनापछि बिहीबार भारतका प्रधानमन्त्री मोदीले भारतको संसदमा राख्नु भएको छ । उहाँले पनि भारतलाई विश्वको शक्तिशाली राष्ट्र बनाउन रिफर्म, पर्फम र ट्रान्सर्फम गर्नुपर्नेमा जोड दिनुभयो ।
आफ्नो अवधारणालाई थप व्याख्या गर्दै उहाँले निश्चित योजना र कठोर परिश्रमले मात्र यो हासिल गर्न सकिने उल्लेख गर्नु भएको छ । कांगेस आईप्रति कटाक्ष गर्दै मोदीले आफ्नो तेस्रो कार्यकालमा भारतलाई विश्वको तेस्रो ठूलो अर्थतन्त्र बनाउने दावी समेत गर्नु भयो ।
नेपालको संसदमा भण्डारीले र भारतको संसदमा मोदीले दिएको साझा अभिव्यक्तिको भिडियो अहिले सामाजिक सञ्जालमा अत्यधिक धेरै हेरिएको छ ।
