काठमाडौं। प्रतिनिधिसभाको आज बोलाइएको बैठक बस्दै नबसी स्थगित भएको छ।अबैध सुन तस्करी प्रकरणका सन्दर्भमा प्रमुख प्रतिपक्षी एमालेले संसद अबरुद्ध गर्दै आएकोमा आजको बैठक पनि सोही आशंकाका बिच स्थगित भएको हो ।

त्रिभुवन विमानस्थल भन्सार कार्यालयबाट बाहिरिएको एक क्वीन्टल सुनको विषयमा एमालेले उच्च स्तरीय छानबिन समितिको माग गर्दै आएको छ । यसमा सत्तापक्ष तयार भएको छैन। यसअघि १० साउनमा बोलाइएको बैठकमा उच्चस्तरीय छानबिन समितिको माग गर्दै एमालेले बैठक अवरुद्ध गरेको थियो ।

आज पनि एमालेले त्यही अडान राखेपछि सरकारको आग्रहमा सभामुख देवराज घिमिरेले प्रतिनिधिसभाको बैठक भोली मंगलबार दिउँसो १ बजेसम्मका लागि स्थगित गर्नुभएको सभामुखको सचिवालय स्रोतले बताएको छ।

यसअघि आज विहान संसद खुलाउने विषयमा नेपाली कांग्रेस, नेकपा एमाले र माओवादी केन्द्रका शीर्ष नेता छलफलमा बसेका थिए । छलफलमा अवरोध खुलाउने प्रयास भएपनि सार्थकता पाउन सकेन ।