काठमाडौं। नेपालको तस्करी दुनियाँमा आजसम्म पनि सुल्झिन नसकेको एउटा चर्चित गुत्थी हो“ साढे ३३ किलो सुन तस्करी र भरिया सनम शाक्य हत्या प्रकरण”, यसको चर्चा सेलाउन नपाउँदै १०० किलो सुन अवैध रुपमा भित्रिँदा त्रिभुवन विमानस्थल तस्करहरूका लागि स्वर्णद्धार साबित हुँदै गएको छ ।

खाडी मुलुकबाट फर्किएको एउटा श्रमिकले ल्याएको २ तोला सुन र २ वटा मोबाइल फोनमा कडाइ गर्ने विमानस्थल भन्सार कार्यालयबाट सयौँ किलो सुन सजिलै पास भएका पछिल्ला घटनाले त्रिभुवन अन्तर्राष्ट्रिय विमानस्थल तस्करहरूको अखडा बन्दै गएको पुष्टि गरेको छ । तस्करहरूले राजनीतिक दलको छत्रछाँयामा रहेर तस्कर गरिरहेको भन्दै तल्लो तहका नेताहरूले आक्रोश गरिरहेका छन् ।

यसै सन्दर्भमा नेपाली कांग्रेसका सांसद सुनिल शर्माले सुन तस्करी बारेको छानबिनमा सहयोग गर्न गृहमन्त्री नारायणकाजी श्रेष्ठ र अर्थमन्त्री प्रकाशशरण महतको राजीनामा दिनुपर्ने माग गर्नुभएको छ । शर्माले राजश्व विभाग र सुरक्षा निकायले एक क्विन्टल सुन अवैद्य रुपमा भित्रिँदा पनि थाहा नपाउने भन्ने कुरै नभएको टिप्पणी गर्नुभयो ।

नेपाल प्रहरीका पूर्व डिआइजी हेमन्त बहादुर मल्ल नेपालमा सुन तस्करी कहिले पनि नरोकिने बताउनुहुन्छ । डिआइजी मल्लले ल्याउने, लुकाउने तरिकाहरू परिवर्तन भइरहने भएका कारण भइरहेको यो तस्करी नरोकिने बताउनुभयो । यसमा सरकारले गम्भीरतापूर्वक नियन्त्रणका उपायहरू अपनाउने हो भने केही कमी गर्न भने सकिने बताउँदै उहाँले सरकार यो विषयमा गम्भीर नबनेको तर्क गर्नुभयो ।

यता, उपप्रधानमन्त्री एवम् गृहमन्त्री नारायणकाजी श्रेष्ठ त्रिभुवन अन्तर्राष्ट्रिय विमानस्थल हुँदै बाहिरिएको सुनकाण्डको अनुसन्धान गर्दै जरासम्म पुग्ने र भविष्यमा यस्ता घटना हुन नदिन योजना बनाउने बताउनुहुन्छ । यो काण्डको सम्पूर्ण पक्ष केलाउने मन्त्री श्रेष्ठको दाबी छ ।

पटक–पटक अवैध तस्करीका घटनाले नेपाललाई रणभूमि बनाउन खोजिएको सांसदहरूले बताएका छन् । सांसदहरूले पटक–पटक गरी क्विन्टलका क्विन्टल सुन भित्रिएका घटनाको सत्यतथ्य पत्ता लगाएर संसद्लाई जानकारी दिनुपर्ने बताएका हुन् । त्रिभुवन अन्तर्राष्ट्रिय विमानस्थलबाट अवैध रुपमा भित्रिने सुन, लागूऔषध, मेसिनरी सामानका कारण विमानस्थलको संवेदनशीलतामाथि गम्भीर प्रश्नचिन्ह खडा भएको छ ।

विमानस्थलका अधिकारी र भन्सारका कर्मचारीकै संलग्नतामा बरामद गरिएको सुन पित्तलमा परिणत हुने र हराउने घटना त नेपालको लागि नौलो विषय होइन । कुनैपनि मुलुकमा हुने चोरी÷तस्करी कर्मचारी र त्यहाँको प्रशासन नमिलेसम्म सम्भव हुँदैन । त्यसकारण यो प्रकरणमा सत्यतथ्य छानबिन गरी दोषीलाई कानुनी कठघरामा उभ्याउनु आजको आवश्यकता हो ।