काठमाडौं। पूर्वराजदूत योगेन्द्र ढकाल अमेरिकाले चीनलाई ‘सुपर पावर’ बन्न नदिन नेपालमा चासो बढाइरहेको बताउनुहुन्छ । लुको छोटो भ्रमणका विषयमा उहाँ एमसीसीको कार्यान्वयनलाई प्रभावकारी रुपमा अगाडि बनाउने र बीआरआईको लगानीबारे नेपाल सकारात्मक भएकोमा अमेरिकाको चासो भएको बताउनुहुन्छ ।

साथै उहाँ अमेरिकाको सुपर पावर कमजोर हुँदै गएको, विश्व बहुध्रुवीय भएको र अमेरिकालाई चीनले चुनौती दिइरहेको अवस्थामा उसले नेपालमार्फत केही काम गर्न चाहेको टिप्पणी गर्नुहुन्छ ।पूर्वराजदूत ढकाल कूटनीति बलियो हुनुपर्नेमा जोड दिनुहुन्छ । नेपालको कूटनीति कमजोर भएको उहाँको तर्क छ ।

आर्थिक, राजनीतिक अवस्था अनि छिमेकी र विश्वको परिस्थितिले कूटनीति निर्धारित गर्ने भन्दै उहाँ सरकारमा पुग्नका लागि कहिले चीन, कहिले भारत र अमेरिकाको कार्ड प्रयोग गर्नु गलत भएको तर्क पनि गर्नुहुन्छ ।अमेरिकी विदेश सहायक मन्त्री डोनाल्ड लुको भ्रमण र दौडधुपप्रति टिप्पणी गर्दै नेकपा एमालेका नेता डा. भीम रावलले नेपालको हितमा र नेपालकै आयोजना भए एमसीसी कार्यान्वयनका लागि अमेरिकाले किन दबाब दिएको भनी प्रश्न गर्नुभएको छ ।

रावलले तारनतार आएर ठुला दलका नेतालाई भेटेको र एमसीसी कार्यान्वयनका लागि धम्की दिएको भन्दै सामाजिक सञ्जालमार्फत आपत्ति जनाउनुभएको हो । नेपालमा लामो विरोधका बीच संसदबाट गत साल पारित भएको एमसीसी कम्प्याक्टअन्तर्गत परियोजनाहरूको कार्यान्वयन यही अगस्त महिनाबाट सुरु गर्ने एमसीए नेपालको तयारी छ ।

एमसीसीले दिने ५० करोड अमेरिकी डलर अनुदान र नेपाल सरकारले गर्ने थप १३ करोड डलर लगानीसहित करिब ८३ अर्ब रुपैयाँ बराबरको यो परियोजना कार्यान्वयन सुरु भएको पाँच वर्षभित्र सम्पन्न हुनै पर्छ ।