काठमाडौं।चर्को ब्याजदरमा ऋण दिने तथा साँवा र ब्याज अरू थप्दै जाने अनि त्यसैका कारण शारीरिक र मानसिक यातनासमेत दिने आपराधिक घटना बारम्बार हुने गरेका छन् । विभिन्न किसिमबाट असुलिने मिटरब्याजीको माकुरे जालो देशैभर व्याप्त छ । त्यसमा सानाठूला सबै खालका कारोबार परेका छन् । मिटरब्याजको जालोमा विपन्न, गरिब समुदायका नागरिक बढी पर्ने गरेका छन् ।

आर्थिक अभाव खड्किएपछि गर्जो टार्न लिइने ऋण आफ्नै लागि अभिसाप बन्ने गरेको छ । सरकारले नागरिकका पीडामा मल्हम लगाउन मिटरब्याज सम्बन्धि विधेयक संसदमा टेबल गर्ने तयारी गरेपनि विभिन्न कारणले त्यो ओझेलमा पर्दै गएको छ । नागरिकको जीवनसँग सरोकार राख्ने मुद्धाहरुमा संसद एकजुट हुनुपर्ने भएपनि त्यसमा समेत राजनीतिक गन्ध मिसिँदा पीडित थप प्रताडित हुने गरेका छन् ।

आजको संसदमा बोल्दै राष्ट्रिय स्वतन्त्र पार्टी (रास्वपा)का सभापति रवि लामिछानेले मिटरब्याज सम्बन्धी विधेयक कार्यसूचीमा नराखे सदन चल्न नदिने चेतावनी दिनुभएको छ । सत्तापक्षकै केही दलका कारणले मिटरब्याज सम्बन्धी विधेयकलाई रोक्न खोजिएको गाईंगुई सुनिएको उल्लेख गर्दै उहाँले विधेयक सदनमा ल्याएपछि को पक्षमा र को विपक्षमा खुल्ने पनि बताउनुभयो ।

मिटरब्याज सम्बन्धि विधेयक टेबल हुने दिन संसद अवरुद्ध भएको स्मरण गर्दै कांग्रेस सांसद विश्वप्रकाश शर्माले छिटो समस्या समाधान गर्नेतर्फ अग्रसर हुन सदनको ध्यानाकर्षण गराउनुभयो । उहाँले नागरिकका पीडामा सरकार गम्भीर बन्नुपर्नेमा पनि जोड दिनुभयो ।

यता, नेकपा एमालेले आफूहरुको कारणले मिटरब्याज सम्बन्धी विधेयक रोकेको भनेर सरकारले भ्रम छरेको आरोप लगाएको छ । प्रतिनिधिसभाको बैठकमा बोल्दै एमाले सांसद रघुजी पन्तले आज विधेयक किन नल्याएको भन्दै प्रश्न गर्नुभयो ।

गृहमन्त्रीलाई प्रश्न गर्दै पन्तले आज आफै संसदमा उपस्थित नहुने र बाहिर धर्ना बसेको ठाउँमा गएर एमालेले विधेयक रोक्यो, जसले रोकेपनि यो विधेयकलाई म अगाडि बढाउँछु भनेर भ्रम छर्ने गरेको आरोप लगाउनुभयो । सांसद बिजुला रायमाझीले जनताको पक्षमा सरकार उदार नभएको आरोप लगाउनुभयो । पीडितलाई न्याय दिने कानून निर्माण गर्न आवश्यक रहेको बताउनुभयो ।

मिटरब्याजले आक्रान्त बनेका नागरिकहरुका पक्षमा बन्न लागेको कानूनमा सरकार उदार हुन जरुरी छ । पैसावालाले निर्धोलाई जहिले पनि हेप्ने चेप्ने वातावरणको अन्त्य हुन जरुरी छ । जनताका विधायकहरुले जनतालाई आहत होइन राहत हुने कानून निर्माणमा ध्यान देओस् ।