काठमाडौं। संसदको प्रमुख प्रतिपक्षी दल नेकपा एमालेले प्रधानमन्त्री पुष्पकमल दाहाल प्रचण्डको अभिव्यक्ति मुलुकको सार्वभौमिकता विपरित रहेको भन्दै राजीनामा मागिरहेका बेला उसलाई बहुमत जुटाउन राष्ट्रिय स्वतन्त्र पार्टीले आग्रह गरेको छ । संविधानको मर्मअनुसार प्रधानमन्त्री पदबाट हटाउन अर्को दलले बहुमत जुटाउनुपर्ने भएकोले त्यसमा केन्द्रीत हुन रास्वपाले चुनौति दिएको छ ।

रास्वपाका महामन्त्री तथा प्रवक्ता मुकुल ढकालले कांग्रेस, एमाले र माओवादी मिलेर सरकार बनाएपनि आफ्नो पार्टी प्रतिपक्षमा बस्ने समेत दाबी गर्नुभएको छ । एक पक्षले एमाले कांग्रेस मिलेर सरकार बनाउन चाहेपनि तत्काल त्यो सम्भव नदेखिएको उहाँको भनाइ छ । लडाकु शिविरमा भएको भ्रष्टाचार प्रकरण बाहिर आउने त्रासले जुनसुकै तरिकाले माओवादी सरकारबाट बाहिर बस्न नचाहेको ढकालको विश्लेषण छ ।

यता, नेकपा एमालेका प्रचार विभाग उपप्रमुख विष्णु रिजालले भारतको कठपुतली प्रधानमन्त्रीले राजीनामा दिनुको विकल्प नभएको दोहो¥याउनुभएको छ । भारतीय नागरिकले आफूलाई प्रधानमन्त्री बनाउन दौडधुप गरेको भन्ने विवादास्पद अभिव्यक्ति मात्रै नभई राज्यद्रोह भएको उहाँको आरोप छ ।

माओवादी केन्द्रका नेता एवं सांसद देवेन्द्र पौडेलले नेपालका प्रधानमन्त्री प्रचण्डलाई भारतले बनाएको हो प्रमाण पेश गर्न एमालेलाई चुनौति दिनुभयो । संसदमा महत्वपूर्ण विषयमा छलफल भइरहेका बेला त्यसलाई छाँयामा पार्ने काम एमालेले गरिरहेको उहाँको आरोप छ । संसदमा प्रधानमन्त्रीले जवाफ दिने प्रशस्त मार्ग छदाँछदै एमालेले राजीनामा माग्नु गलत भएको पौडेलको दाबी छ ।

नेकपा एकीकृत समाजवादीका महासचिव घनश्याम भुसालले एमाले अध्यक्ष केपी शर्मा ओलीलाई सत्ताबाट बाहिरिनुको पीडा नै संसद् अवरुद्ध रहेको दाबी गर्नुभयो । प्रधानमन्त्रीले विवेक पु¥याएर बोल्ने विषय भएपनि गलत भए संसद्मा जवाफ माग गर्न सकिने उहाँको भनाइ छ । प्रधानमन्त्रीले धेरै बोल्न आवश्यक पनि नरहेको भुसालको सुझाव छ ।

प्रधानमन्त्रीको राजीनामा मागेको एमालेले निरन्तर संसद अवरुद्ध गर्दै आएको छ । प्रचण्डले राजीनामा दिएपछि सरकार कसले बनाउने भन्ने नै अन्यौल रहेका बेला एमाले धमिलो पानीमा माछा मारिरहेको छ । आफूले बहुमत जुटाउन पनि नसक्ने, संसद् पनि अवरुद्ध पार्ने विषय लोकतान्त्रिक अभ्यासको बर्खिलाप हो ।