नेपाली नागरिकलाई भुटानी शरणार्थी बनाएर तेस्रो देश पठाउने भन्दै पैसा असुल्ने गिरोहसँग मिलेमतो गरेको आरोपमा कांग्रेस नेता एवं पूर्व गृहमन्त्री बालकृष्ण खाँण पक्राउ परेपछि कांग्रेस, माओवादी केन्द्र र एमालेमा दबाब सिर्जना भएको छ । लहरो तान्दा पहरो भनेझैँ एकतर्फ हानेको तीर अर्कै तर्फ मोडिँदा सबैलाई टाउको दुखाईको विषय बनेको छ । चार महिना अघिसम्म पूर्वप्रधानमन्त्री शेरबहादुर देउवाको मन्त्रिपरिषद्का शक्तिशाली गृहमन्त्री खाँण अहिले प्रहरी हिरासतमा पुग्दा यो घटनालाई चाँसोका रुपमा हेरिएको छ ।

शरणार्थी समस्या समाधान गर्न होइन, नक्कली शरणार्थी खडा गर्ने प्रपञ्चमा ओली सरकारका पाला खडा गरिएको कार्यदलको प्रतिवेदनमा त्यतिबेलै प्रश्न उठिसकेको थियो । तर, ओलीलाई विस्थापित गर्दै देउवा प्रधानमन्त्री भएपछि गृह मन्त्रालयको नेतृत्वमा आएका खाँणले गिरोहलाई कारबाही गर्नुको सट्टा मिलेमतो गरेर पैसा उठाएको प्रमाण भेटिएपछि प्रहरीले पक्राउ गरेको हो । यो विषयलाई कुनैपनि हालतमा विषयान्तर गर्न नहुने भन्दै विद्यार्थी संगठनहरुपनि प्रदर्शनमा उत्रिएका छन् । आज नेकपा एकीकृत समाजवादी निकट अनेरास्ववियू, माओवादी निकट अखिल क्रान्तीकारीले दोषीलाई उन्मुक्ति दिन नहुने बताएका छन् । अनेरास्ववियूका अध्यक्ष सुदेश पराजुलीले सरकारसँग ऐकेबद्धता जनाउँदै दोषीमाथि कारबाही गर्न भनेको छ । अखिल क्रान्तीकारीकी अध्यक्ष पञ्चा सिंहले यो प्रकरणलाई सामसुम पार्ने काम गर्न नहुने बताउनुभयो ।

मानव तस्करीजस्तो जधन्य अपराधलाई संयुक्त राष्ट्र संघले पनि नजिकबाट हेरिरहेकोले यो अनुसन्धान थप पेचिलो बनेको छ । मुलुककै गृहमन्त्री, मन्त्रीनै यो कार्यमा संलग्न भइरहेका बेला एमालेले भने पानीमाथि हिलो छ्याप्ने काम गरिरहेको देखिएको छ । अहिले आएको प्रकरणलाई किनारा लगाउनुको साँटो एमाले अध्यक्ष केपी शर्मा ओली लडाकू शिविरको विषय तर्फ केन्द्रीत बन्नुभएको छ ।

यता, नेकपा माओवादी केन्द्रका नेता देवेन्द्र पौडेलले गल्ती गर्नेलाई कारबाहीको दायरामा ल्याउनैपर्ने जिकिर गर्नुभयो । यो प्रकरणमा चुकियो भने नेपालका दलहरुप्रति जनताको भरोसा टुट्ने उहाँको दाबी छ ।

नक्कली भुटानी शरणार्थी प्रकरणका विषयमा सरकार पनि निर्मम भएर उभिएको छ । सरकारमाथि दबाब सिर्जना भएपनि हालका गृहमन्त्री नारायणकाजी श्रेष्ठले खुट्टा नकमाउने बताइसक्नुभएको छ । यसरी भ्रष्टाचारीहरुको एकपछि अर्को फाइल खोल्दै जाने हो भने जनतामा समेत आशा पलाउने थियो ।