काठमाडौंं। नेपाली कांग्रेसले आगामी बैशाख १० मा हुने उपचुनावमा प्रतिनिधि सभा सदस्यका लागि चितवन २ मा जीतनारायण श्रेष्ठ र तनहुँ १ मा गोविन्द भट्टराईलाई उम्मेदवार बनाउने भएको छ ।

सानेपास्थित पार्टी केन्द्रीय कार्यालयमा बसेको कार्यसम्पादन समितिको बैठकले श्रेष्ठ र भट्टराईलाई उम्मेदवार बनाउने निर्णय गरेको हो। श्रेष्ठ चितवनका पूर्वजिल्ला सभापतिसमेत हुनुहुन्छ ।

यसअघि गत मंसिर ४ मा सम्पन्न निर्वाचनमा प्रतिनिधि सभा सदस्यमा रवि लामिछाने नागरिकता विवादमा दोषी ठहर भई पदमुक्त भएपछि यो क्षेत्रमा उपनिर्वाचन हुन लागेको हो।

तनहुँ १ मा भने प्रतिनिधि सभा सदस्यमा निर्वाचित रामचन्द्र पौडेल राष्ट्रपतिमा निर्वाचित भएपछि यो क्षेत्रमा उपनिर्वाचन हुन लागेको हो। श्रेष्ठ र भट्टराई दुवैले उपनिर्वाचनमा आफ्नो जित निश्चित रहेको बताएका छन्।

यस्तै, कांग्रेसले बारा-२ को उपनिर्वाचनमा उम्मेदवार नउठाउने भएको छ। कांग्रेसले बारा-२ मा जनता समाजवादीका अध्यक्ष उपेन्द्र यादवलाई सघाउने निर्णय गरेको हो ।