काठमाडौं । प्रतिनिधि सभाको आजको बैठक शुरु भएको छ। आजको बैठकमा प्रधानमन्त्री पुष्पकमल दाहाल ‘प्रचण्ड’ले विश्वासको मत लिंदै हुनुहुन्छ ।

गत पुस १० गते नेकपा एमालेसँग गठबन्धन गरेर प्रधानमन्त्री बन्नु भएका ‘प्रचण्ड’ र उहाँको पार्टी नेकपा माओवादी केन्द्रले राष्ट्रपति निर्वाचनमा नेपाली कांग्रेसका उम्मेदवारलाई सघाउने निर्णय गरेपछि एमालेले ‘प्रचण्ड’लाई प्रधानमन्त्रीमा दिएको समर्थन फिर्ता लिएको थियो ।

‘प्रचण्ड’ले एमालेसहितको गठबन्धन भएका बेला यसअघि पहिलो पटक गत पुस २६ मा संसदमा विश्वासको मत लिनुभएको थियो ।

राष्ट्रिय प्रजातन्त्र पार्टीले पनि ‘प्रचण्ड’लाई दिएको समर्थन फिर्ता लिएको थियो । अहिले कांग्रेस सहितको अर्को समीकरण बनेपछि ‘प्रचण्ड’ले दोस्रो पटक आज विश्वासको मत लिन लाग्नु भएको हो ।