काठमाडौं। नेकपा माओवादी केन्द्रका सुदूरपश्चिम प्रदेश संसदीय दलका नेता खगराज भट्टले यथास्थितिमा मुख्यमन्त्री कमलबहादुर शाहलाई विश्वासको मत नदिने बताउनुभएको छ ।

नेपाली रेडियो नेटवर्कको कार्यक्रम ‘नेपाली बहस’मा पत्रकार ऋषि धमलासँग कुराकानी गर्दै भट्टले प्रदेश संसदीय दलको बैठकले यथास्थितिमा मुख्यमन्त्रीलाई विश्वासको मत नदिने सर्वसम्मत निर्णय गरेको र अब पार्टीको केन्द्रीय नेतृत्वलाई पनि त्यसमा कन्भिन्स गरेर अगाडी बढ्ने बताउनुभयो ।

नेता भट्टले निर्वाचन अघि प्रधानमन्त्री पुष्पकमल दाहाल प्रचण्ड र तत्कालीन प्रधानमन्त्री शेरबहादुर देउवाले गरेको प्रतिबद्धता अनुसार आफूले मुख्यमन्त्री पाउनुपर्ने दाबी गर्नुभयो।आफू मुख्यमन्त्री नभए नेतृत्वको विश्वसनीयतासमेत समाप्त हुने भट्टको चेतावनी छ ।

सत्ता साझेदारीमा सहमति हुने आधार र सम्भावना जिवित रहेको भट्टको भनाई छ । पुरानो समझदारीमा नेपाली कांग्रेसको इमानदारी र विश्वसनीयता आवश्यक रहेको पनि उहाँले बताउनुभयो ।