काठमाडौं । नेपाली कांग्रेसका वरिष्ठ नेता रामचन्द्र पौडेलले मुलुक अस्थिरतातिर जान लागेको बताउनुभएको छ ।

आज काठमाडौंमा आयोजित एक कार्यक्रममा बोल्दै उहाँले संविधान जारी भएपछि राजनीतिक स्थायीत्वको आशा गरे पनि प्रतिनिधिसभाको अघिल्लो कार्यकालमा स्थायीत्व हुन नसकेको भन्दै पौडेलले अहिले पनि मुलुक अस्थिरतातिर जान लागेको बताउनुभयो ।

तत्कालिन प्रधानमन्त्री केपी शर्मा ओलीले संसद विघटन गर्दा राजनीतिक स्थिरताकै लागि आन्दोलन गरेको भन्दै वरिष्ठ नेता पौडेलले स्थयीत्व दिने पटक पटकको प्रयास असफल भएको बताउनुभयो ।

उहाँले अब राष्ट्रिय सहमतिको सरकार निर्माणका लागि पहल गर्नुपर्ने बताउनुभएको छ । उहाले मुलुक राजनीतिक, आर्थिक, सामाजिक र मानवीय समस्याले घेरिएको भन्दै यो बेलामा राष्ट्रिय सहमतिको सरकार आवश्यक पर्ने बताउनुभयो ।

केही समय मुलुकका सबै राजनीतिक शक्ति मिलेर पटक पटकको राजनीतिक क्रान्तिबाट प्राप्त परिवर्तन र संविधानको रक्षा गर्नुपर्ने बरिष्ठ नेता पौडेलको भनाई छ ।