काठमाडौं । जाजरकोट प्रहरीले नेपाल कम्युनिस्ट पार्टी (बहुमत) का एक नेतालाई पेस्तोल र ग्रिनेडसहित पक्राउ गरेको छ ।
नेकपा (बहुमत) जाजरकोट जिल्ला सम्मेलन आयोजक कमिटीका सदस्य इन्द्रबहादुर शाही (नवीन)लाई पाँच राउन्ड गोली भएको पेस्तोल र प्लास्टिक हेन्ड ग्रिनेडसहित पक्राउ परिएको जाजरकोटका डीएसपी सन्तोष निरौलाले जानकारी दिनुभयो ।
नलगाड नगरपालिका– ६ सिर्केबाट पक्राउ परेका शाहीको साथबाट २ एमएम नौ राउन्ड, मेड इन युएसए लेखेको पेस्तोल, एचजी लट ४ लेखिएको तयारी अवस्थामा रहेको प्लास्टिक हेण्ड ग्रिनेड बरामद भएको डीएसपी सन्तोषकुमार निरौलाले जानकारी दिनुभयो ।
पक्राउ परेका शाहीविरुद्ध जाजरकोट जिल्ला अदालतबाट सात दिनको म्याद थप लिई अनुसन्धान गरिरहेको प्रहरीले जनाएको छ ।
यता, नेकपा (बहुमत) जाजरकोटले भने योजनाबद्ध ढंगले हतियार भिराएर शाहीलाई गिरफ्तार गरिएको आरोप लगाएको छ । पक्राउ परेका शाहीलाई बिनासर्त रिहाइ गर्न नेकपा बहुमतका जिल्ला इन्चार्ज प्रेमप्रकाश वली ‘धमिल’ले माग गरेका छन् ।
