देहरादुन । भारतको उत्तराखण्ड प्रदेशका मुख्यमन्त्री पुष्कर सिंह धामीले नेपाल र भारतका बीचमा जनस्तरमा अझ सम्बन्ध बढाउन आवश्यक रहेकोमा जोड दिनुभएको छ । नेपाल र भारतका बीचमा धेरै समानता रहेकाले जनस्तरमा थप सम्बन्ध विस्तार गरी आपसी सम्बन्धलाई बलियो र विश्वासिलो बनाउनु पर्नेमा उहाँले जोड दिनुभएको हो ।

नेपाल पत्रकार महासङ्घका अध्यक्ष विपुल पोखरेल नेतृत्वको टोलीसँगको भेटका क्रममा उहाँले दुई देशको सम्बन्ध राम्रो बनाउन र जनताका बीचमा सकारात्मक प्रभाव पार्न दुवै देशका सञ्चार माध्यमहरूले प्रभावकारी भूमिका खेल्न सक्ने बताउनुभएको थियो । भेटघाटका क्रममा अध्यक्ष पोखरेलले मुख्यमन्त्री धामीलाई नेपाल भ्रमणमा आउन आग्रह गर्नु भएको थियो । जवाफमा उहाँले नेपालका धेरै धार्मिक, सांस्कृतिक तथा पर्यटकीय क्षेत्रहरूमा भ्रमण गर्ने चाहना पनि व्यक्त गर्नुभएको थियो ।

मुख्यमन्त्री धामीलाई महासंघ अध्यक्ष पोखरेलले नेपाल आउँदा पशुपतिनाथ मन्दिर नजिकै नेपाल पत्रकार महासङ्घको केन्द्रीय कार्यालय रहेकाले त्यहाँ पनि आउन निमन्त्रणा गर्नुभएको थियो । महासङ्घका पूर्व अध्यक्ष गोविन्द आचार्य सहितको सो नेपाली टोलीले भारतको प्रदेशस्तरका सञ्चार सम्बन्धी कानुनी व्यवस्था र मिडियाको व्यवस्थापनका बारेमा छलफल गरेको थियो ।