काठमाडौं । सत्ता गठबन्धन दल आगामी निर्वाचनमा सिट बाँडफाँटबारे निर्णायक छलफलमा जुटेका छन् । पार्टीभित्र दुई दिनसम्म छलफल गरेका दलहरु आज पनि छलफलमा जुट्दैछन् ।

गठबन्धनका शीर्ष नेता र कार्यदलका सदस्यहरुको बैठक आज दिउँसो ३ बजेका लागि बोलाइएको छ । बैठक प्रधानमन्त्रीको सरकारी निवास बालुवाटारमा बस्नेछ । यस्तै, आज बिहान प्रधानमन्त्री शेरबहादुर देउवा र नेकपा माओवादी केन्द्रका अध्यक्ष पुष्पकमल दाहालबीच भेटवार्ता भएको छ । दुई शीर्ष नेताबीच सिट बाँडफाँटबारे समान धारणा बनाउनेबारे छलफल भएको छ ।

त्यसअघि प्रधानमन्त्री देउवाले हिजो साँझ आफ्नै पार्टीका शीर्ष नेताहरुसँग छलफल गर्नुभएको थियो । गठबन्धनमा कांग्रेसले १००, माओवादी केन्द्रले ६०, नेकपा एकीकृत समाजवादीले ४०, जसपाले ३२ र जनमोर्चाले २ सिट दाबी गरेका छन् ।

तर बिहीबारको बैठकमा दलहरुबीच सहमतिका विभिन्न खाकामाथि छलफल भएको छ । आजको छलफलले सहमति जुटाउन सक्ने नेताहरुले बताएका छन् ।