२०८३, कार्तिक २६ गते
- यो साता चर्चामा :
काठमाडौं । नेपाली कांग्रेसका सभापति एवम् प्रधानमन्त्री शेरबहादुर देउवा र नेकपा माओवादी केन्द्रका अध्यक्ष पुष्पकमल दाहालबीच भेटवार्ता भएको छ ।
प्रधानमन्त्री देउवाले बिहीबार बिहान सत्ता गठबन्धन दलका शीर्ष नेताहरूसँग छलफल गर्न चाहानुभएको थियो। बिहान १० बजेका लागि बैठक बोलाइएको थियो ।
तर, नेताहरूको व्यस्तताका कारण गठबन्धनको बैठक बस्न नसकेको हो । सचिवालयका अनुसार प्रधानमन्त्री देउवाले माओवादी केन्द्रका अध्यक्ष दाहालसँग भने छलफल गर्नुभएको छ। देउवा–दाहालबीच नागरिकता विधेयक संसद्बाट पारित गर्ने विषयमा छलफल भएको थियो ।
कांग्रेस, माओवादी केन्द्रसहित पाँच दलबीच आगामी चुनावमा तालमेल गरेर अघि बढ्ने सहमति छ । तर, सिट बाँडफाँटको टुंगो लागेको छैन । गठबन्धनले कृष्णप्रसाद सिटौला नेतृत्वमा कार्यदल बनाए पनि कार्यदलले सिट बाँडफाँटको टुंगो लगाउन सकेको छैन ।
अब बस्ने गठबन्धनको बैठकमा कार्यदलका संयोजक सिटौलाले सिट बाँडफाँटबारे कार्यदलमा भएको छलफलको प्रगति प्रस्तुत गर्ने तयारी गर्नुभएको छ ।
गठबन्धनको बैठक शुक्रबार बस्ने तयारी छ ।
