काठमाडौं । शिक्षा, विज्ञान तथा प्रविधि मन्त्री देवेन्द्र पौडेलले कागज अभाव र चुनावका कारण समयमा पुस्तक छाप्न नसकिएको बताउनुभएको छ ।
मंगलबार प्रतिनिधि सभा बैठकमा सांसदहरूले सोधेको प्रश्नको जवाफ दिँदै उहाँले गत वर्ष असार १ गतेदेखि शैक्षिक सत्र सुरु भएकोमा यो वर्ष १ महिना अगाडि सारिएको बताउनुभयो ।
कोभिड १९ का कारण शैक्षिक सत्र असारमा पुगेकोमा यो वर्षदेखि शैक्षिक सत्र १ महिना अगाडि सार्नु र कागज अभाव भएका कारण पुस्तक प्रकाशनमा ढिलाइ भएको दाबी गर्नुभयो ।
उहाँले पुस्तक छाप्नका लागि प्रमाणित भएको गुणस्तरीय कागज विदेशबाट ल्याउनुपर्ने भएकोले सहज रुपमा आपूर्ति हुन नसकेको बताउनुभयो । मन्त्री पौडेलले भन्नुभयो–‘म आफैंपनि ५ पटक जनक शिक्षामा पुगेको छु । समयमा पाठ्यपुस्तक पुर्याउने कुरा हामीले सार्वजनिक रुपमा गरेको हुँदा त्यसका लागि हामीले अहोरात्र ध्यान दियौँ । तर दुर्भाग्य कागजको आपूर्ति समयमा हुन सकेन । निर्वाचन आयोगले गरेको चुनावमा जनक शिक्षाका कर्मचारी पनि जानुपर्ने बाध्यात्मक स्थिति बन्यो । जसले गर्दा पाठ्यपुस्तक पुर्याउन १५ दिन ढिला भएको जानकारी गराउन चाहन्छु ।’
उहाँले पढाइमा बाधा नपरोस् भनी सामूहिक अध्ययनका लागि वैकल्पिक व्यवस्था गरिएको जानकारी गराउनुभएको छ ।
