चितवन । नेपाली कांग्रेसका प्रवक्ता डा.प्रकाशशरण महतले कांग्रेस अहंकारको बाटोमा नरहेको बताउनुभएको छ। सत्ता सहयात्री दल माओवादी केन्द्रका अध्यक्ष पुष्पकमल दाहाल प्रचण्डले कांग्रेसलाई थर्काएको भनेर बुझ्न नहुने पनि उहाँले बताएउनुभएको हो । शुक्रबार भरतपुर विमानस्थलमा सञ्चारकर्मीसँग कुराकानी गर्दै महतले सो कुरा बताएउनुभएको हो।

केही दिनअघि प्रचण्डले एक सार्वजनिक कार्यक्रममा कांग्रेसले पनि दम्भ र अहंकार बोके एमालेलाई जसरी ठेगान लगाइदिने चेतावनी दिनुभएको थियो । प्रचण्डको सोही कुरालाई थर्काएको भनेर बुझ्न नमिल्ने उहाँले बताउनुभयो ।

‘उहाँ ९प्रचण्ड०ले आफ्ना कार्यकर्तालाई सम्बोधन गर्ने क्रममा त्यो भन्नुभयो होला । त्यसलाई ज्यादा महत्व दिनुपर्छ भन्ने म ठान्दिनँ’, उहाँले भन्नुभयो, ‘नेपाली कांग्रेस कहिल्यै पनि अहंकारको बाटोमा छैन । यस विषयमा उहाँले आशंका गर्नुपर्ने आशंका पनि छैन ।’

कांग्रेसले वास्तविकताको धरातलमा उभिएर राजनीति गर्ने उहाँले बताउनुभयो । कांग्रेसको नेतृत्व एमालेको नेतृत्व जस्तो अहंकारको बाटोमा हिँड्छ कि भनेर आशंका गर्न जरुरी नभएको भन्दै उहाँले कांग्रेस सभापति आफू नै सर्वेसर्वा भनेर नहिँडेको बताउनुभएको छ । जिससको निर्वाचनमा पनि गठबन्धनका दलहरूबीच सहकार्य गर्ने सहमति भएको भन्दै उहाँले त्यसमा सबै दल प्रतिबद्ध हुनुपर्ने बताउनुभयो ।

केही ठाउँमा अपवादबाहेक स्थानीय तहको निर्वाचनको परिणाम सकारात्मक आएको महतले बताउनुभयो ।