काठमाडौं । प्रहरी महानिरीक्षक (आइजिपी) धिरजप्रताप सिंहले निर्मला हत्या प्रकरणको अनुसन्धान आफ्नो प्राथमिकतामा रहेको बताउनुभएको छ । उहाँले आफ्नो कार्यकालमा निर्मला प्रकरणलाई टुंगोमा पुर्याउन प्रयास गरिने पनि बताउनुभयो ।
आइजिपीको कार्यभार सम्हालेको एक महिना पुगेको अवसरमा बिहीबार प्रहरी प्रधान कार्यालयमा आयोजित पत्रकार सम्मेलनमा उहाँले निर्मला हत्याकाण्डमा आरोपीमाथि अनुसन्धान जारी रहेको बताउनुभयो ।
कञ्चनपुरकी निर्मला पन्तको बलात्कारपछि हत्या भएको घटनामा संलग्न अभियुक्तलाई अहिलेसम्म पनि प्रहरीले पक्राउ गर्न सकेको छैन ।
सिंहले गलत काम गर्ने प्रहरीमाथि कारबाही सुरु गरिएको भन्दै बढुवाको हकमा मेरिट बेसमा गरिने पनि बताउनुभयो । ‘तलबाट टपक्क टिपेर कसलाई पनि ल्याइँदैन । ब्याचमा बेस्ट भएका अगाडि आउँछन्’, उहाँले भन्नुभयो ।, ‘सोर्सफोर्सले बढुवा हुँदैन । शक्तिकेन्द्र धाउनेको रेकर्ड राखिन्छ ।’
