काठमाडौं । कैलालीको टिकापुर नगरपालिकामा भर्खरै गठन भएको नागरिक उन्मुक्ति पार्टीले जित दर्ता गरेको छ ।

टिकापुर नगरपालिकाको मेयरमा रामलाल डगौरा थारु विजयी भएका हुन् । उनले आफ्ना निकटतम प्रतिस्पर्धी कांग्रेसका नवराज रावललाई तीन हजार मत अन्तरले पराजित गरेका हुन् ।

डगौराले ९ हजार ६ सय ४२ मत प्राप्त गर्दा कांग्रेसका उम्मेदवार रावलले ६ हजार ६ सय ४२ मत पाएका थिए । उपमेयरमा भने माओवादी केन्द्रका खडक शाह ७ हजार ९ सय ५५ मतसहित विजयी भएका हुन् ।

मेयरमा विजयी डगौंराले टिकापुरमा भड्किएको सद्भावलाई मिलाएर लैजाने बताएका छन् । उनले कुनै जात विशेष नभइ समग्र टिकापुरबासीको पक्षमा काम गर्ने बताएका हुन् ।

खड्कबहादुर सिंह र रेशम चौधरीलाई सम्झिँदा

यतिबेला रेशम चौधरी काराबासको जीवन व्यतित गरिरहेका छन् । टिकापुरमा भएको नरसंहारको योजनकारको आरोप लागेसँगै उनी कारागारमा छन् । कारागारमा रहेपनि चौधरीले आफू निर्दोष रहेको विभिन्न प्रमाण राज्य सामू बिसाइरहेका छन् ।

यसअघि प्रतिनिधिसभाको निर्वाचनमा भारी मतले विजयी भएका चौधरीको पार्टीले अहिले स्थानीय तहको निर्वाचनमा शानदार मत ल्याएको छ । टिकापुर, जोशीपूरलगायतका पालिकामा नागरिक उन्मुक्ति पार्टी जबरजस्त देखिएको छ ।

निर्वाचनमा विजयी भएको मात्र नभइ आफूमाथि ठूलो जिम्मेवारी थपिएको बताएका मेयर रामलाल डगौंराले शुरुमा टिकापुर शहर निर्माता खडकबहादुर सिंहलाई सम्झिए । नागरिक उन्मुक्ति पार्टीकी अध्यक्ष राञ्जिता श्रेष्ठले पनि सिंहको योगदानलाई थप मलजल गर्ने बताइन ।

विजय उत्सवमा सहभागीहरुले अब भने टिकापुरको विकासले गति लिने अपेक्षा गरेका छन् । लामो समय जातीय राजनीति हाबी भएको टिकापुरमा अब भने तोडिएको छ । थारु समाजका डगौंराले धेरै पहाडी समुदायको मत बटुलेका छन् ।

हिजो खडकबहादुरको शालिक राख्न नमान्नेहरु अहिले पराजित भएको त्यहाँका स्थानीय बताउँछन् । इतिहासलाई नमान्नेहरुले हार मात्रै होइन अन्य धेरै नियती व्यहोर्नुपर्ने त्यहाँका स्थानीयको भनाइ छ ।