काठमाडौँ । प्रधानमन्त्री तथा नेपाली काँग्रेसका सभापति शेरबहादुर देउवाले डडेल्धुराको विकासका लागि काँग्रेसका उम्मेदवार जिताउनुको विकल्प नभएको बताउनुभएको छ । आज चुनावी प्रचारका लागि गृहजिल्ला डडेल्धुरा पुग्नुभएका देउवाले डडेल्धुराको अमरगढीमा आयोजित चुनावी आमसभालाई सम्बोधन गर्दैे काँग्रेस उम्मेदवारलाई जिताए डडेल्धुरामा विकास गरेर प्रदेश राजधानी समेत बनाउने आश्वासन दिनुभयो ।

२०७४ मंसिरमा सम्पन्न प्रदेश तथा प्रतिनिधि सभाको चुनावपछि देउवा नेतृत्वको सरकारले नै कैलालीको धनगढीलाई प्रदेशको अस्थायी राजधानी तोकेको थियो । सुदूरपश्चिम प्रदेशसभाले कैलालीको गोदावरीलाई प्रदेश राजधानी तोक्ने निर्णय गरेपनि उक्त निर्णय कार्यान्वयन हुन सकेको छैन ।

डडेल्धुरा जिल्ला सदरमुकाममा बसपार्क अभाव भएकाले डकलेमा बसपार्क बनाउन पहल गर्ने देउवाको भनाइ छ । देउवाले पोखरा–बेलारपुर तथा उग्रतारा–मेलौली सडक कालोपत्र बनाउने काम आफूले सुरु गरिसकेको दाबी समेत गर्नुभयो ।

प्रधानमन्त्री देउवाले पश्चिम सेती जलविद्युत आयोजना निर्माणका लागि अग्रसरता बढाएको जानकारी दिनुभयो । पश्चिम सेती बन्यो भने सुख्खायममा पनि लोडसेडिङ नहुने प्रधानमन्त्री देउवाको दाबी छ ।