काठमाडौँ । काठमाडौँ महानगरपालिकाको मेयर पदका लागि स्वतन्त्रतर्फका उम्मेदवार बालेन शाहल आज मनोनयन दर्ता गर्नुभएको छ । मनोनयन दर्तापछि शाहले आफ्नो जित निश्चित भएको बताउनुभएको छ ।

आफू केवल मत कटुवा उम्मेदवारमात्र नभएको पनि उहाँले बताउनुभएको छ । शाहले एमाले र कांग्रेस दुवैको भोट काटेर जित्नेमा आफू ढुक्क रहेको बताउनुभयो । अहिले राजनीतिक पार्टीप्रति जनतको वितृष्णा बढ्दै गएको र राजनीतिक दलका नेताहरु जनताप्रति जवाफदेही नभएको कारणले जनताले यसपटक आफूलाई जिताउँछन् भन्ने उहाँको विश्लेषण छ ।

आफू कुनै राजनीतिक दलसँग आवद्ध नभएको र आफूले चुनाव जितेपछि पार्टीलाई चन्दा दिनु नपर्ने, कुनै नेताको चाकडी गर्नु नपर्ने र पैसा पनि कमाउन नपर्ने भएकोले चुनाव जितेपछि विना झन्झट् जनमुखी काम गर्न सक्ने शाहको भनाइ छ ।

शाहले आफूसँग प्रष्ट भिजन भएको पनि बताउनुभएको छ । काठमाडौँबारे शाहले आफ्नो भिजन घोषणपत्रमार्फत प्रष्ट पार्नुभएको छ । आफ्नो स्वच्छ छवि, इमान्दारीता र प्रष्ट भिजनको आडमा चुनाव जित्ने उहाँको दाबी छ ।