काठमाडौँ । सत्ता गठबन्धनको एउटा घटक नेकपा एकीकृत समाजवादीले महानगरपालिका र उपमहानगरपालिकाका उम्मेदवार टुंग्याएको छ । गठबन्धनमा भएको सहमतिअनुसार आफूले पाएको सिटका लागि एकीकृत समाजवादीले उम्मेदवार टुंगो लगाएको हो ।

सत्ता गठवन्धनका दलहरुबीच भएको सहमतिअनुसार एकीकृत समाजवादीको भागमा पोखरा महानगरपालिकाको मेयर र काठमाडौं महानगरपालिकाको उपमेयर पद परेको थियो । त्यस्तै, उपमहानगरपालिकामध्ये मकवानपुरको हेटौँडमा प्रमुख तथा रुपन्देहीको बुटवल, दाङको तुल्सीपुर र सुनसरीको इटहरीमा उपमेयर पाउने सहमति भएको थियो ।

पार्टीको पदाधिकारी बैठकले कास्की जिल्ला अध्यक्षसमेत रहनुभएका धनराज आचार्यलाई पोखरा महानगरपालिकाको मेयरको उम्मेदवार बनाउने निर्णय गरेको छ । त्यस्तै, काठमाडौं महागरपालिकाको उपमेयरमा रामेश्वर श्रेष्ठलाई उम्मेदवार बनाउने निर्णय भएको छ ।

हेटौंडा उप महानगरपालिकामा मीना लामालाई मेयरको उम्मेदवार बनाउने निर्णय भएको छ । इटहरी उपमहानगरपालिकाको उपमेयर केशव विष्टलाई बनाउने निर्णय गरेको छ भने बुटवल उपमहानगरपालिकाको उपमेयरमा चीनबहादुर गुरुङलाई उम्मेदवार बनाउने निर्णय गरेको बताइएको छ । दाङको तुल्सीपुरमा उपमेयरको उम्मेदवारको विषय भने टुंगिन बाँकी रहेको नेताहरुले बताएका छन् ।