काठमाडौँ । नेकपा एकीकृत समाजवादीका अध्यक्ष माधवकुमार नेपालले किन एमालेबाट विद्रोह गर्नुपर्‍यो भन्ने कारणबारे जनतालाई बुझाउन कार्यकर्तालाई आह्वान गर्नुभएको छ ।

आज स्थानीय तहको चुनावबारे भिडियो सन्देश जारी गर्दै अध्यक्ष नेपालले आफ्ना कार्यकर्तालाई भन्नुभएको छ, ‘तपाईंहरु पार्टीका नीति र कार्यक्रमलाई आत्मसात् गरेर जनताको माझमा पर्‍याउने काम गर्नुस्। यो पार्टी गठनको औचित्य के हो? हामीले किन पुरानो पार्टी एमालेबाट विद्रोह गर्नुपर्‍यो? विद्रोहको के बाध्यता आइलाग्यो? त्यसलाई प्रष्ट पार्नुस् । तथ्यहरु प्रमाणहरु पस्किनुस् ।’

उहाँले तथ्य र प्रमाण पस्किएपछि विपक्षीले केही बोल्न नसक्ने पनि बताउनुभएको छ । अध्यक्ष नेपालले कार्यकर्तालाई एक–एक घटनाहरुलाई सम्झिन र नोट गर्न पनि भन्नुभएको छ । उहाँले आफूहरुले आफ्नो नीति कम्युनिस्ट आन्दोलनको हितका खातिर अगाडि बढाएको दाबीसमेत गर्नुभएको छ ।

आफ्नो नीति र कार्यक्रम नेपालमा समाजवाद निर्माण गर्नका लागि भएको उहाँको भनाइ छ । एमालेको नाम नलिइ अध्यक्ष नेपालले सो पार्टीभित्र कम्युनिस्टको आवरणमा गहिरो र गम्भीर विचलन देखा परेको टिप्पणी गर्नुभयो ।