काठमाडौं । नेकपा (एकीकृत समाजवादी)को स्थायी कमिटीको बैठक आज बस्दैछ । बैठक आज बिहान ११ बजे बस्ने एकीकृत समाजवादीले जनाएको छ ।

बैठकमा अमेरिकी सहयोग परियोजना एमसीसीको विषयमा छलफल हुने नेताहरूले जनाएका छन् । आज दिउँसो १ बजे प्रतिनिधि सभाको बैठक बोलाइएको छ । उक्त बैठक बस्नुअघि एकीकृत समाजवादीले स्थायी कमिटी बैठक बोलाएको हो ।

सरकारमा भए पनि एकीकृत समाजवादीले यथास्थितिमा एमसिसी पास गर्न नहुने पक्षमा छ । यद्यपि, शनिबार प्रधानमन्त्री शेरबहादुर देउवासँगको छलफलपछि भने नेकपा एस लचिलो देखिएको छ ।

एमसिसीबारे प्रश्न उठेका विषयमा संसदबाट व्याख्यात्मक घोषणा गर्न प्रधानमन्त्री देउवा तयार भएपछि एकीकृत समाजवादी आफ्नो अडानबाट केही पछि हटेको हो । साथै, अर्को सत्ता साझेदार दल नेकपा माओवादी केन्द्र पनि प्रधानमन्त्री देउवाको आश्वासनपछि एमसिसी अनुमोदनका लागि सकारात्मक भएको छ ।