काठमाडौं । नेकपा एमालेका नेता खगराज अधिकारीले अन्तराष्ट्रिय डिजाइनमा कम्युनिस्टहरुलाई परास्त गर्ने षडयन्त्रमा पुष्पकमल दाहाल ‘प्रचण्ड’ र माधव नेपाल हतियार भएको बताउनुभएको छ ।

नेपाली रेडियो नेटवर्कको नेपाली बहसमा पत्रकार ऋषी धमलासंगको कुराकानीमा उहाँले कम्यूनिष्ट समाप्त पार्ने षडयन्त्र अदालत मार्फत भइरहेको आरोप लगाउनुभयो ।

गजेन्द्र हमालले कांगे्रस छाडेर दश वर्षसम्म हिन्दु राष्ट्र र राजसंस्थाको पक्षमा अभियान चलाएर हिडेकाले राजनीतिक पृष्टभुमिबाट आएको भनेर सरकार तर्किन नपाउने बताउनुभयो ।

परमआदेशबाट आएको यो सरकारले लोकतन्त्र, राष्ट्रियता र स्वाधिनतालाई ध्वजाध्वजा बनाएर खाएको उहाँको ठहर छ ।

नेता अधिकारीले सरकारको कामले संसदमा एमालेले उठाएको कुरा सत्य प्रमाणीत हुँदै गएको दावी गर्नुभयो । पछिल्लो कार्यहरुले यस्तो सरकार र सभामुख हुनु भन्दा नहुनु बेश हुने उहाँको भनाई छ ।

कार्यपालिकामा भाग खोजेर अदालतले न्यायको घाँटी निमोठ्ने काम गरेको पनि आरोप लगाउनुभएको छ ।