काठमाडौँ । नेकपा माओवादी केन्द्रका अध्यक्ष पुष्पकमल दाहाल प्रचण्डले नेकपा एकीकृत समाजवादी गठनमा आफूहरुको पनि मेहनत परेको बताउनुभएको छ । आज काभ्रेमा आयोजित कार्यक्रममा उहाँले सो पार्टीसँग सहकार्य बढाउन कार्यकर्तालाई निर्देशन दिनुभयो ।

‘माधवजी, झलनाथजीको अर्को पार्टी बनेको छ । त्यो पार्टी बनाउनमा हाम्रो कम मेहनत छैन’ उहाँले भन्नुभयो, ‘तपाईंहरु पनि ‘ती साथीहरुसँग सहज ढंगले सहकार्य बढाउनुहोला ।’

प्रचण्डले विगतमा माधव नेपाल समूहमा रहेका र हाल नयाँ पार्टी गठनमा साथ नदिएका नेताहरु भीम रावल, घनश्याम भुसाल, योगेश भट्टराईलगायतका नेताहरु पनि एमालेमा धेरै नटिक्ने दावी गर्नुभयो ।

‘बडो दया लाग्छ ती साथीहरुलाई देख्दा, ढिलो छिटो त्यहाँबाट निस्कछन् । त्यहाँ बस्ने ठाउँ छैन’ प्रचण्डको भनाइ छ । उहाँले बाबुराम भट्टराई, मोहन वैद्य, विप्लव र मोहनबिक्रम सिंहको पार्टीसँग सहकार्य गर्न पनि काभ्रेका नेता कार्यकर्तालाई आग्रह गर्नुभएको छ ।