काठमाडौँ – नेपाल कम्युनिष्ट पार्टी एकीकृत समाजवादीले संसद बैठकमा आफूहरुलक्षित नाराबाजीलाई असंवैधानिक, अलोकतान्त्रिक, अनैतिक र निकृष्ट कामको संज्ञा दिएको छ ।

नेकपा एमालेले १४ सांसदलाई आफूले गरेको कारबाहीलाई सभामुखले मान्यता नदिएको भन्दै आजको संसद बैठकमा नाराबाजी गरेको थियो ।

एमालेको नाराबाजीलाई नेकपा एसले आफै नांगिने हर्कत भनेको हो ।

नेकपा एसका सांसद जीवनराम श्रेष्ठले प्रतिनिधिसभाको दुई पटक हत्या गर्ने एमाले अध्यक्ष ओलीको नेतृत्वमा भएको आजको हर्कत अनौठो पनि नभएको बताउनुभयो ।

एमालेका सांसदहरुले आफूबाट विभाजित भएर बनेको एकीकृत समाजवादीका सांसदहरुलाई गैरसांसद भन्दै संसदबाट निकाल्न माग गरेर नाराबाजी गरेका थिए ।

बैठक सुरु हुनासाथ एमालेले नाराबाजी गरेपछि सभामुख सापकोटाले सचेतक विशाल भट्टराईलाई बोल्न समय दिनुभएको थियो ।

सचेतक भट्टराईले एमाले विभाजनको मतियार किन बन्नुभो भन्दै सभामुखविरुद्ध प्रश्न गर्नुभयो ।

एमालेले १४ सांसदलाई गरिएको कारबाहीलाई मान्यता नदिएकोमा जवाफ माग गरेपछि सदनबाटै सभामुखले नियमानुसार गरेको बताउनुभयो ।

तर एमालेले नाराबाजी नरोकपछि सभामुख सापकोटा जंगिनुभयो । प्रतिनिधिसभा नियमावलीको व्यवस्था हेर्नू भन्दै एमाले सांसदसँग उहाँ जंगिनुभएको हो ।

उहाँले एमालेले उठाएको विषय सर्वोच्च अदालतमा विचाराधीन रहेको भन्दै त्यस विषयमा प्रतिनिधिसभामा छलफल गर्न नमिल्ने बताउनुभयो ।

आफूलक्षित नाराबाजी हुन थालेपछि सभामुख सापकोटाले प्रतिनिधिसभा नियमावलीको नियम २१ को खण्ड ख, ग र घ को प्रावधान ध्यानाकर्षण गराउनुभयो । उहाँले सांसदहरुलाई मर्यादाबाहिर नजान चेतावनीसमेत दिनुभयो ।

सभामुखले भनेको संसद नियमावलीको नियममा सभामुखको आचरणको आलोचना गर्न नहुने विषय छ ।

यसैबीच प्रमुख प्रतिपक्षी दल नेकपा एमालेको अवरोधका बीच सरकारले राजनीतिक दलसम्बन्धी अध्यादेश प्रतिनिधिसभामा टेबुल गरेको छ ।

आज प्रतिनिधिसभाको नवौँ अधिवेशनको तेस्रो बैठकमा प्रमुख प्रतिपक्षी दल नेकपा एमालेको नाराबाजीबीच गृहमन्त्री बालकृष्ण खाणले राजनीतिक दलसम्बन्धी (दोस्रो संशोधन) अध्यादेश, २०७८ प्रतिनिधिसभासमक्ष टेबुल गर्नुभएको हो ।

लगत्तै संसद बैठक स्थगित गरिएको थियो । सभामुख अग्नि सापकोटाले प्रतिनिधिसभाको अर्को बैठक भदौ २५ गते शुक्रबार दिउँसो १ बजेका लागि बोलाउनुभएको छ ।