काठमाडौँ । प्रधानमन्त्री शेरबहादुर देउवाले संसद् अधिवेशन बोलाउनका लागि सभामुख अग्निप्रसाद सापकोटाका साथै सत्तारुढ दलका नेताहरूसँग छलफल थाल्नुभएको छ । देउवाले आज बिहान बालुवाटारमा सभामुख सापकोटा, सत्तारुढ घटक नेकपा (माओवादी केन्द्र)का अध्यक्ष पुष्पकमल दाहाल र नेकपा एकीकृत समाजवादी पार्टीका अध्यक्ष माधवकुमार नेपालसँग छलफल गनुभयो ।

छलफलमा सहभागी कानुन, न्याय तथा संसदीय मामिलामन्त्री एवम् सरकारका प्रवक्ता ज्ञानेन्द्रबहादुर कार्कीले संसद अधिवेशन बोलाउनेबारे छलफल भएको बताउनुभयो । संसद् अधिवेशन बोलाउनेबारे प्रधानमन्त्रीसँग सभामुख र सत्तारुढ दलका नेताहरूबीच के कस्तो सहमति भएको भन्नेबारे भने केही खुलाइएको छैन ।

बैठकमा सत्तारुढ गठबन्धनको एकता, सरकारका कामकारबाहीमा प्रभावकारिता र मन्त्रिपरिषद्लाई पूर्णता दिने विषय पनि उठेको प्रधानमन्त्री देउवाको सचिवालयले जानकारी दिएको छ । प्रधानमन्त्री देउवाले सत्तारुढ गठबन्धनभित्र संसद्बाट अमेरिकासँग गरिएको एमसीसी सम्झौता पास गराउने विषयलाई छलफलको विषय बनाउनुभएको छ । एमसीसी पास गर्नकै लागि संसद् अधिवेशन बोलाउनुपर्नेमा प्रधानमन्त्री देउवाको जोड छ ।