काठमाडौं । नेकपा एमाले निकट प्रगतिशील तथा पेसागत कानुन व्यवसायी संगठन नेपाल (पीपीएलए)को आज बोलाइएको भेलाका कारण एमाले भित्र फेरि अर्को विवाद चर्किएको छ ।

संगठनका अध्यक्ष रुद्रप्रसाद नेपाललाई जानकारी नै नदिई एमाले अध्यक्ष केपी शर्मा ओलीले संगठनको केन्द्रीय भेला आयोजना गरिदिएपछि विवाद चर्किएको हो ।

एमालेको दोस्रो पुस्ताका नेताहरुले अध्यक्ष नेपाललाई जानकारी नै नदिई अध्यक्ष ओलीले एकलौटी तरिकाले भेला बोलाएको भन्दै आपत्ति जनाएका छन् ।

साथै अध्यक्ष नेपालले पनि आज बोलाइएको बेला आधिकारीक नभएको भन्दै भेलामा उपस्थीत नहुन आह्वान गर्नुभएको छ ।
ललितपुरको च्यासलस्थित तुल्सीलाल स्मृति प्रतिष्ठानमा गर्न लागिएको भेलामा प्रमुख अतिथिका रूपमा अध्यक्ष ओलीले नै सम्बोधन गर्ने कार्यक्रम तय भएको छ ।

विवाद भएका संगठनहरुको विवाद मिलाउन भन्दै गठन गरिएको कार्यदललाई समेत जानकारी नदिई ओली समूहले भेला आयोजना गरेको हो ।

संगठनका इन्चार्जसमेत रहेका स्थायी कमिटी सदस्य रघुजी पन्तले भेलाबारे कुनै जानकारी नभएको बताउनु भएको छ । पन्तले एकतर्फी भेला रोक्न आग्रह गर्दासमेत ओली समूहले नमानेपछि दोस्रो पुस्ताका नेता रुष्ट भएका छन् ।