काठमाडौँ – नेपाली कांग्रेसका वरिष्ठ नेता रामचन्द्र पौडेलले १४ औँ महाधिवेशनमा आफूलाई सभापतिमा सघाउन इतर पक्षका नेताहरुलाई आग्रह गर्नुभएको छ । तर उहाँको पक्षमा सहमति जुट्न नसकेको नेताहरुले बताएका छन् ।

बुधबार इतर पक्षका सभापतिका दाबेदारहरुबीच भएको बैठकमा पौडेलले अन्तिम पटकका लागि आफूलाई सभापतिमा सघाउन आग्रह गर्नुभएको थियो ।

आफूलाई सभापतिमा सघाए अरु नेताहरुलाई पदाधिकारीमा समेटेर अघि बढ्ने उहाँको भनाइ थियो । तर सभापतिका दाबेदार प्रकाशमान सिंह बाहेक सहभागी बैठकमा अधिकांशले उहाँको आग्रह अस्वीकार गरेका छन् ।

रामचन्द्र समूहबाट सभापतिमा एकल उम्मेदवारी तय गर्नका लागि सहमति जुटाउने प्रयास लामो समय देखि भैरहेको छ, तर सहमति जुट्न सकिरहेको छैन ।