काठमाडौं – महाकाली नदी तर्दै गरेका नेपाली युवक खसेर बेपत्ता भएको घटना छानबिन गर्न गृह मन्त्रालयले गठन गरेको टोली दार्चुला पुगेको छ । गृहमन्त्रालयका सहसचिव जनार्दन नेपाल नेतृत्वको टोलीले आजबाट काम थालेको छ ।

१५ साउनमा व्यास गाउँपालिका–२ का जयसिंह धामी महाकाली नदी तर्ने क्रममा महाकाली नदीमा खसेर बेपत्ता भएका थिए । भारतीय सीमा सुरक्षा बल (एसएसबी)ले तुइनको डोरी चुडाइदिएपछि उनी महाकालीमा खसेको स्थानीय प्रत्यक्षदर्शीको भनाइ छ ।

सो घटना छानबिन गर्न गठित गरिएको टोली मंगलबार जिल्ला पुगेको दार्चुला प्रहरी प्रमुख डिएसपी मनोहरप्रसाद भट्टले जानकारी दिनुभयो ।
उक्त टोलीले सत्यतथ्य पत्ता लगाइ प्रतिवेदन बुझाउन १० दिनको समय पाएको छ । टोलीले मंगलबार घटनाको छानबिन कसरी गर्ने, घटनास्थलसम्म कसरी जानेजस्ता विषयमा स्थानीय अधिकारीहरुसँग छलफल गरेको थियो ।

टोलीले धामी तुुइन तर्ने क्रममा घटनास्थलमा रहेका प्रत्यक्षदर्शीसँगसमेत भेट गर्नेछ भने घटनास्थलमै पुुगेर अध्ययन पनि गर्ने बताइएको छ ।

धामीका परिवारले भने उनी जीवितै भेटिने आशा मार्दै कुशको आकृति बनाएर हिन्दूू संस्कारअनुसार अन्त्येष्टि गरिसकेको छ । धामीका श्रीमती, पाँच वर्षीय छोरा र डेढ वर्षकी छोरी छन् ।