काठमाडौँ – नेपाल कम्युनिष्ट पार्टी नेकपाका नेताहरुले पार्टी अध्यक्ष पुष्पकमल दाहाल प्रचण्डमाथि पार्टी एकता विपरीत गतिविधि गरेको आरोप लगाएका छन्। स्थायी कमिटि बैठकमा टुंगिसकेको विषयलाई सार्वजनिक समारोहमा व्यक्त गरेर प्रचण्डले पार्टी हित विपरीत कार्य गरेको उनीहरुको आरोप छ।

विषेशगरी पार्टीभित्र प्रधानमन्त्री समेत रहनुभएका पार्टी अध्यक्ष केपी शर्मा ओली समूहका नेताहरुले प्रचण्डलाई पार्टी हित विपरीत गतिविधि गरेको आरोप लगाएका हुन्।

शुक्रबार काठमाडौँमा आयोजित एक कार्यक्रममा प्रचण्डले पार्टीका अध्यक्ष केपी शर्मा ओली समेतको सक्रियतामा नेकपा एमाले निर्वाचन आयोगमा दर्ता भएको आरोप लगाउनुभएको थियो। अध्यक्ष ओलीकै सक्रियतामा नेकपा एमाले दर्ता भएको बताउँदै प्रचण्डले पार्टी साच्चिकै संकटमा रहेको बताउनुभएको थियो।

यस्तै नेकपाभित्र नेपालको नयाँ नक्सा जारी भएको विषयमा पनि जस लिने होडबाजी अझै जारी छ । अध्यक्ष प्रचण्डले नयाँ नक्सा प्रकाशनको विषय पार्टीको निर्णय भएको बताउँदै उतिबेला आनाकानी गर्ने प्रधानमन्त्रीको देवत्वकरण र आफूहरुकाविरुद्ध मुर्दावादको नारा लगाइएकोमा पनि आपत्ति जनाउनुभयो।

प्रदेश नम्बर ५ का मुख्यमन्त्री समेत रहेका नेता शंकर पोखरेलले आफू प्रधानमन्त्री हुँदा नक्साको कुरा थाहा नपाउनेले अहिले आफूले नक्सा प्रकाशन गरेको हो भन्न नमिल्ने बताउनुभएको हो। ‘कालापानी क्षेत्रको सीमा विवाद पुरानै हो। आफू प्रधानमन्त्री हुँदा नक्साको कुरा था नपाउनेले अहिले उहाँले होइन मैले हो भन्न कसरी सकेको ?’ पोखरेलले फेसबुकमा लेख्नुभएको छ।

यसअघि नेकपाका उपाध्यक्ष बामदेव गौतमले पनि सचिवायल बैठकमा नयाँ नक्सा प्रकाशनको निर्णय आफ्नो दबाबमा भएकोले कसैलाई देवत्वकरण गर्न आवश्यक नरहेको भन्दै वक्तव्य जारी गर्नुभएको थियो ।