नेपाली कांग्रेसका नेता एवं पूर्वमन्त्री डा प्रकाशशरण महतले पार्टीलाई विग्रहबाट जोगाएर एक ढिक्का बनाउन शेरबहादुर देउवाको विकल्प नभएको दाबी गर्नुभएको छ । नेपाली रेडियो नेटवर्कको  कार्यक्रम ‘नेपाली बहस’ मा पत्रकार खेम बमसँग संवाद गर्दै नेता महतले सो विचार व्यक्त गर्नुभएको हो । संवादका क्रममा महतले कांग्रेसभित्र आन्तरिक लोकतन्त्र सुदृढ रहेको भए पनि पार्टीलाई एकजुट राख्न परिपक्व नेतृत्व चाहिने उल्लेख गर्नुभयो । वर्तमान राजनीतिक परिस्थिति र पार्टीभित्रको सन्तुलनलाई मिलाएर लैजान सक्ने क्षमता सभापति देउवामै छ, महतले भन्नुभयो, पार्टीलाई थप बलियो र संगठित बनाउन उहाँको विकल्प खोज्नु प्रत्युत्पादक हुन सक्छ ।  उहाँले आसन्न सांगठनिक चुनौतीहरू र राजनीतिक समीकरणहरूलाई व्यवस्थापन गर्न देउवाकै नेतृत्व सर्वस्वीकार्य र व्यावहारिक हुने तर्क समेत अघि सार्नुभयो । कांग्रेसभित्र फरक मत र असन्तुष्टिहरू देखिए पनि नेतृत्वले सबै पक्षलाई समेटेर अघि बढ्ने नीति लिएको उहाँको भनाइ थियो । महतले पार्टीका सम्पूर्ण नेता तथा कार्यकर्तालाई आन्तरिक गुटबन्दी त्यागेर संगठन सुदृढीकरणमा लाग्न समेत आग्रह गर्नुभएको छ।