काठमाडौं - आज शेयर बजारको इतिहासमा चारवटा रेकर्ड कायम भएका छन् । आज शेयर बजारको इतिहासमा सबैभन्दा धेरै रकमको कारोबार भएको हो ।

आज २१६ कम्पनीको २ करोड ७१ लाख ४० हजार कित्ता शेयर खरिदविक्री हुँदा १३ अर्ब १७ करोड ५३ लाख बराबरको कारोबार भएको छ ।

नेप्से परिसूचकमा पनि आज रेकर्ड कायम भएको छ । बजार खुले लगत्तै २८५० अंक पुगेर रेकर्ड राखेको परिसूचक अन्तिममा २८२३ मा पुगेर रोकियो ।

सिंगल स्क्रिप्टको कारोबारमा पनि आज हाइड्रोइलेक्ट्रिसिटी इन्भेष्टमेन्ट एण्ड डेभलप्मेन्ट कम्पनी लिमिटेड (एचआइडिसिएल)को २१ लाखभन्दा बढी कित्ता कारोबार भएर रेकर्ड बनेको छ ।

कारोबार रकममा सिंगल स्क्रिप्टको यसअघिको पुनर्बीमा कम्पनीको रकर्ड एचआईडीसीएलले तोडेको हो। यसको आजमात्रै १ अर्ब २६ करोडभन्दा बढी रकमको कारोबार भएको छ।

आज चार कम्पनीको शेयर मूल्य ९ प्रतिशतभन्दा बढीले बढेको छ ।