काठमाडौँ । नेपाली काँग्रेसका बरिष्ठ नेता रामचन्द्र पौडेलले प्रधानमन्त्री केपी शर्मा ओलीले निर्वाचन गराउने नियतले निर्वाचन घोषणा नगरेको दावी गर्नुभएको छ ।

काँग्रेस चुनावबाट अहिलेको अवस्थामा डराउनु पर्ने कुनै कारण नरहेको उल्लेख गर्दै उहाँले लोकतान्त्रीक पार्टीले विधि प्रक्रियाबाट तय गरिएको र विधि प्रक्रियाबाट हुने निर्वाचनमा मात्रै भाग लिने स्पष्ट पार्नुभयो ।

उहाँले निर्वाचन गराउछु र काँग्रेस ठुलो पार्टी हुन्छ, त्यसपछि हस्तान्तरण गर्छु भनेर ओलीले निर्वाचनको मिति घोषणा नगरेको दावी गर्नुभयो । नेपाली रेडियो नेटवर्कको नेपाली बहसमा उहाँले भन्नुभयो, “प्रधानमन्त्री र राष्ट्रपतिले संविधान र लोकतन्त्र मास्न लागेका छन्, त्यसलाई जोगाउन अव संघर्ष गर्नुपर्दछ ।”

निर्वाचनमा जाँदैनौ भनेर आफुहरुले कहिल्यै पनि नभनेको बताउदै उहाँले प्रक्रिया नपुगेको निर्वाचनमा सहभागी हुने भन्ने कुरा नै नआउने बताउनुभयो । शाहीकालमा भएका र पंचायतीकालमा भएका अवैधानिक निर्वाचनहरुलाई पनि काँग्रेसले अस्विकार गरेका दृष्टान्त उहाँले प्रस्तुत गर्नुभयो ।

“संविधान र लोकतन्त्र बचाउनका लागि फेरि एक पटक संघर्ष गर्नु पर्ने भएको छ, प्रतिपक्षीको साझा उम्मेदवार पनि भएकाले देउवाजीको नेतृत्वमा संयुक्त संघर्ष हुनुपर्छ,” बरिष्ठ नेता पौडेलले भन्नुभयो । उहाँले कोरोनाभाइरसको महामारीका कारण अहिले सडक संघर्षभन्दा अन्य उपायबाट हुने संघर्ष गर्नु पर्नेमा जोड दिनुभयो ।

“लोकतन्त्रका लागि राणा, पञ्चायत, राजासँग पनि लडेको हो, हामी संघर्षबाट डराउदैनौ, लोकतन्त्र विनाको चुनावको अर्थ छैन, त्यसैले पहिला लोकतान्त्र जोगाउ अनि चुनाव गराऔँ,” उहाँले भन्नुभयो । निर्वाचन आयोगका पदाधिकारीले आफुसँगको कुराकानीमा अहिले निर्वाचन संभव नभएको बताएको पनि उहाँले जानकारी दिनुभयो ।

अहिले संविधान मन नपराउनेहरु एकातिर र संविधान बचाउनेहरु अर्कोतिर भएको पनि बरिष्ठ नेता पौडेलले तर्क गर्नुभयो ।