काठमाडौं – विपक्षी गठबन्धनका नेताहरुले नयाँ सरकार गठनका लागि आवश्यक बहुमत जुटाएका छन् । आज प्रमुख प्रतिपक्षी दल नेपाली कांग्रेस संसदीय दलको कार्यालय सिंहदरबारमा बसेको बैठकले यस्तो निर्णय गरेको हो ।

कांग्रेस, नेकपा (माओवादी केन्द्र), जनता समाजवादी पार्टी (जसपा) र नेकपा (एमाले)को माधवकुमार नेपाल पक्षका शीर्ष नेताहरुको बैठकले नयाँ सरकार गठनका लागि हस्ताक्षर जुटाएको कांग्रेसका एक सांसदले बताए ।

उनका अनुसार देउवालाई प्रधानमन्त्री बनाउने प्रस्तावमा १४९ जना सांसदको हस्ताक्षर जुटेको छ ।

स्रोतका अनुसार प्रस्तावमा नेपाल पक्षका २७ जना सांसदले हस्ताक्षर गरेका छन् । यस्तै कांग्रेसका ६१, माओवादीका ४९ र जसपाका १३ सांसदले हस्ताक्षर गरेका छन् ।

राष्ट्रपति विद्यादेवी भण्डारीले बिहीबार २१ घण्टाको समय दिएर आज अपराह्न ५ बजेसम्मको समय दिनुभएको छ ।

यसैबीच, आजै मात्र प्रधानमन्त्री केपी शर्मा ओलीले पत्रकार सम्मेलन गर्दै आफू अझै सहमतिको सरकारको पक्षमा रहेको बताउनुभएको छ ।