काठमाडौं ।  नेकपाका उपाध्यक्ष वामदेव गौतमले आफु अध्यक्ष पुष्पकमल दाहाल प्रचण्डकै गुटमा रहेको स्पष्ट पार्नुभएको छ ।

कहिले प्रधानमन्त्री केपी शर्मा ओलीको गुटमा र कहिले प्रचण्डको गुटमा देखिने गरेका गौतमले आफु अहिले प्रचण्डकै गुटमा रहेको स्पष्ट पार्नुभएको हो ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुराकानी गर्दै उहाँले भन्नुभयो, “राम्रो विचार र प्रस्ताव जस्ले ल्याउछ, म त्यसैको गुटमा हुन्छु । अहिले उहाँहरुले राम्रो प्रस्ताव ल्याउनु भएको छ, त्यसैले म उहाँहरुसँगै छु ।

”उपाध्यक्ष गौतमले पुर्वप्रधानमन्त्रीहरु प्रचण्ड, माधव नेपाल, झलनाथ खनाललगायतका नेताहरुले अहिले राम्रो प्रयास गरिरहेको बताउनुभयो ।

आफु प्रचण्ड गुटमा भएपनि प्रधानमन्त्री ओलीले समेत बेला बेलामा बोलाउने र छलफल गर्ने गरेको पनि उहाँले जानकारी दिनुभयो ।
आफु तत्कालिन नेकपा एमालेको महाधिवेशनमा ओली गुटबाट उपाध्यक्ष भएको र निर्वाचित भएलगत्तै उहाँको गुट त्यागेको गौतमले दावी गर्नुभयो ।

तत्कालिन एमालेमा गुटबन्दी बनाएर पार्टी फुटाउनु भएका उपाध्यक्ष गौतमले आफु स्थायी रुपमा कुनै गुटबन्दीमा नलाग्ने जिकिर पनि गर्नुभयो ।

उहाँले प्रधानमन्त्री तथा पार्टी अध्यक्ष ओलीलाई दुवै पदबाट राजीनामा दिनुपर्छ भन्ने माग अहिले आफ्नो नरहेकोस्पष्ट पार्नुभयो ।
“राजीनामा दिने की नदिने भन्ने कुरा उहाँले नै जान्ने कुरा हो, केही साथीहरुले राजीनामा दिदा राम्रो हुन्छ भनेका हुन्, तर पार्टीकै प्रस्तावको रुपमा भने छैन,” उहाँले भन्नुभयो ।

ओलीले राजीनामा दिएर पार्टी भित्रको समस्या समाधान हुन्छ भन्ने बारेमा आफुले केही भन्न नसक्ने गौतमको आशय थियो । तर ओली दुवै पदमा रहदाँ समस्या सृजना भएकाले स्वेच्छाले छोड्न आग्रह गरिएकोर दवाव भने नदिइएको उहाँले दावी गर्नुभयो ।

मंसिरमा महाधिवेशन गर्ने प्रस्तावलाई अस्विकार गर्दै उपाध्यक्ष गौतमले आगामी चैत भित्र महाधिवेशन हुने विश्वास व्यक्त गर्नुभयो ।