२०८३, कार्तिक २२ गते
- यो साता चर्चामा :
काठमाडौं । नेकपा (एमाले)को संसदीय दलका नेता केपी शर्मा ओलीले आज ४३औँ प्रधानमन्त्रीका रूपमा शपथग्रहण गर्नुभएको छ । उहाँ तेस्रोपटक प्रधानमन्त्री बन्नुभएको हो ।
संसद्को सबैभन्दा ठूलो दलको हैसियतमा बिहीबार प्रधानमन्त्रीमा नियुक्त भएसँगै आज ओलीले राष्ट्रपति विद्यादेवी भण्डारीसँग पद तथा गोपनीयताको शपथ लिनुभएको हो ।
आज दिउँसो करिब पौने ३ बजे राष्ट्रपति कार्यालय शीतलनिवासमा आयोजिक कार्यक्रमा ओलीले ४३औँ प्रधानमन्त्रीको रूपमा शपथ लिनुभएको हो । शपथ लिएसँगै उहाँले मन्त्री तथा राज्यमन्त्रीहरुलाई पनि सपथ गराउनुभएको थियो । मन्त्रिमण्डलमा उहाँले सबै पुरानै मन्त्रीहरुलाई निरन्तरता दिनुभएको छ ।
राष्ट्रपति भण्डारीले संविधानको धारा ७६(३) अनुसार संसद्को सबभन्दा ठुलो दलको संसदीय दलको नेताको हैसियतमा ओलीलाई बिहीबार प्रधानमन्त्रीमा नियुक्त गर्नुभएको थियो ।
प्रधानमन्त्री ओलीले २७ वैशाखमा संसदको विश्वास पाउन नसकेपछि राष्ट्रपतिले तीन दिनभित्र संविधानको धारा ७६ (२) अनुसार दुई वा दुईभन्दा बढी दलको समर्थनमा सरकार गठनका लागि आहृवान गर्नुभएको थियो ।
वैकल्पिक सरकार गठनको प्रयासमा जुटेका नेपाली कांग्रेस र माओवादी केन्द्र बहुमत जुटाउन असफल भएपछि ओली पुनः प्रधानमन्त्री बन्न सफल हुनुभएको हो ।
जनता समाजवादी पार्टी (जसपा)को महन्थ ठाकुर–राजेन्द्र महतो पक्षले नयाँ सरकार गठनका लागि साथ दिएन भने एमालेको माधवकुमार नेपाल समूहका सांसदहरुले वैकल्पिक सरकार गठनका लागि बहुमत पुग्ने गरी राजीनामा दिएन ।
बहुमत नपुग्ने भएपछि कांग्रेस–माओवादी गठबन्धनले सरकारका लागि दाबी नै गरेन ।
त्यसपछि राष्ट्रपतिले ७६ (३) अनुसार संसदको सबभन्दा ठूलो दललाई सरकार गठनको अवसर दिनुभएको हो ।
