काठमाडौं । नेकपा (एमाले)का अध्यक्ष केपी शर्मा ओलीले पार्टी खोस्ने ढंगले कोही आएको भए, त्यो सम्भव नहुने बताउनुभएको छ ।

बालुवाटारमा आज महाधिवेशन आयोजक कमिटीको बैठकलाई सम्बोधन गर्दै ओलीले माधव नेपाल र उहाँका समूहले पार्टीलाई एकताबद्ध बनाउन कुनै पहल नै नगरेको बताउनुभएको छ ।

‘माधव नेपाल, योगेश भट्टराईलगायत नेतासँग मेरो भेटघाट भएपनि उनीहरुले पार्टी एकताबद्ध बनाउन कुनै पहल गरेको महसुस र अनुभूति मैले देखिनँ’, उहाँले भन्नुभयो ।

तर, आफू भने पार्टी एकताबद्ध बनाउन दिनरात लागिपरेको प्रधानमन्त्री ओलीको दाबी छ ।

‘हामी जिम्मेवार र अनुशासित भएकाले यो पार्टी एकता कायम गर्न प्रयास गर्छौ’, उहाँले भन्नुभयो ।

पुष्पकमल दाहाल प्रचण्ड र नेपालहरुको महत्वाकांक्षाकै कारण कम्युनिष्ट पार्टी विभाजित हुन पुगेको पनि ओलीले बताउनुभएको छ ।

यसैबीच, आजै नेता नेपालले भने पार्टी अध्यक्ष एवं प्रधानमन्त्री ओलीको अहंकार धरहरामाथि पुगिसकेको टिप्पणी गर्नुभएको छ ।

आज जनकपुरधाममा आयोजित पत्रकार सम्मेलनमा उहाँले ओलीको अंहकार र दम्भका कारण लोकन्तन्त्र धरापमा परेको बताउनुभएको हो ।