२०८३, कार्तिक २१ गते
- यो साता चर्चामा :
काठमाडौं । प्रधानमन्त्री केपी शर्मा ओलीले सर्वदलीय बैठकमा सभामुख अग्निप्रसाद सापकोटाविरुद्ध आक्रोश पोख्नुभएको छ । प्रधानमन्त्री निवास बालुवाटारमा जारी बैठकमा प्रधानमन्त्री ओलीले संसदमा सभामुख अग्निप्रसाद सापकोटाले आफूलाई काम गर्न नदिएको भन्दै आक्रोश पोख्नुभएको हो ।
सभामुखले काम गर्न नदिएकाले वर्तमान संसदले राजनीतिक निकास नदिने प्रधानमन्त्रीले बताएको बैठकमा सहभागी एक नेताले जानकारी दिनुभएको छ ।
‘बैठकमा प्रधामन्त्रीले संसदमा सभामुखले अराजक र अनैतिक काम गरिरहेको भन्ने शब्द प्रयोग गर्नुभयो’, ती नेताले भने ।
उनका अनुसार बैठकमा कोरोना नियन्त्रणका विषयमा हामीले ६-७ बुँदामा सुझाव दिइएको थियो ।
बैठकमा नेपाली कांग्रेसका सभापति शेरबहादुर देउवा, वरिष्ठ नेता रामचन्द्र पौडेल, नेता बालकृष्ण खाँड, विमलेन्द्र निधि तथा नेपाल मजदुर किसान पार्टीका प्रेम सुवाल, जसपाबाट महन्थ ठाकुर र लक्ष्मणलाल कर्ण, राप्रपाबाट प्रकाशचन्द्र लोहनीलगायत नेता सहभागी हुनुहुन्छ ।
त्यस्तै, बैठकमा उपप्रधानमन्त्री ईश्वर पोखरेललगायत मन्त्रीहरु प्रदीप ज्ञवाली, विष्णु पौडेल सहभागी छन् ।
बैठकमा एमाले नेताद्वय झलनाथ खनाल र माधवकुमार नेपाल भने सहभागी भएका छैनन् ।
साथै, बैठकमा नेकपा (माओवादी केन्द्र)का अध्यक्ष पुष्पकमल दाहाल प्रचण्ड तथा जसपाका अध्यक्षहरु डा बाबुराम भट्टराई र उपेन्द्र यादव पनि सहभागी छैनन् । भट्टराई र यादवलाई निम्तो नै नगरिएको स्रोतले जनाएको छ ।
प्रधानमन्त्री ओलीले बोलाएको सर्वदलीय बैठक ११ बजेपछि सुरु भएको थियो ।
