काठमाडौं । नेकपा एमालेको संसदीय दलको बैठकमा आज नेपाल खनाल समूहका सांसदहरु पनि सहभागी हुने संभावना देखिएको छ ।

प्रदेश एक र बागमती प्रदेशमा मुख्यमन्त्री विरुद्ध राखिएको अविश्वासको प्रस्ताव फिर्ता लिएर नरम देखिएको नेपाल खनाल पक्षले संघीय संसदमा पनि नरम भूमिका देखाउने संभावना बढेको हो ।

नेपाल खनाल समूहका सांसद सोमप्रसाद पाण्डेले आज पार्टी अध्यक्ष केपी शर्मा ओलीले बोलाएको संसदीय दलको बैठकमा आफ्नो समूहका सांसदहरु सहभागी हुने सम्भावना रहेको जानकारी दिनुभएको छ ।

उहाँले संसदमा प्रधानमन्त्री ओलीविरुद्ध अविश्वासको प्रस्ताव पेस भएमा एमालेका सबै सांसदले ओलीलाई साथ दिने दावी पनि गर्नुभयो ।
नेपाली रेडियो नेटवर्कको नेपाली बहसमा सांसद पाण्डेले पार्टी संसदीय मूल्य मान्यताअनुरुप चल्ने भएकाले अध्यक्ष ओलीले बोलाएको संसदीय दलको बैठकमा सबै सहभागी हुने बताउनुभयो ।

प्रधानमन्त्री ओलीले दिउसो ३ बजेपछि प्रधानमन्त्री निवास बालुवाटरमा बस्नेगरी संसदीय दलको बैठक बोलाउनु भएको छ । सूर्य चुनाव चिन्ह लिएर निर्वाचनमा विजयी भएका सवै सांसदहरुलाई बैठकमा बोलाइएको एमाले संसदीय दलका प्रमुख सचेतक विशाल भट्टराईले जानकारी दिनुभएको छ ।
बैठकमा चालु अधिवेशनलाई कसरी प्रभावकारी बनाउने र सांसद्हरूको विकास बजेट खर्चको सन्दर्भमा छलफल हुने जनाइएको छ ।