काठमाडौं । नेपाली कांग्रेसका वरिष्ठ नेता रामचन्द्र पौडेलले पार्टीको १४ औं महाधिवेशनमा कसैको गुटमा नलाग्न कार्यकर्ताहरुलाई आह्वान गर्नुभएको छ । उहाँले शेरबहादुर देउवा वा आफू पक्ष कसैसँग नटासिन भन्दै गुटगत राजनीति त्यागेर राष्ट्रप्रति इमान्दार हुनुपर्ने बताउनुभयो ।

शनिबार (आज) बिहान काठमाडौंमा आयोजित पार्टी प्रवेश कार्यक्रममा पौडेलले भन्नुभयो, ‘देउवालाई पनि नसमात्नुस्, पौडेललाई पनि नसमात्नुस् । कांग्रेस समात्नुस्, रुख समात्नुस्, लोकतन्त्र समात्नुस्।’

उहाँले कांग्रेसप्रति जनतामा गलत सन्देश गएको बताउँदै त्यसलाई चिर्नुपर्ने धारणा राख्नुभयो । कांग्रेसभित्र निष्ठा, सदाचारी र स्वच्छ इमेज भएका मानिसहरु हुँदाहुँदै पनि कांग्रेसको इमेज जनतामा राम्रो नभएको नेता पौडेलको भनाइ छ ।