काठमाडौं । कारागारमा रहेका सांसद रेशम चौधरीले पार्टीले लिने निर्णयमा आफू बाधक नबन्ने बताएका छन् । डिल्लीबजार कारगारमा रहेका चौधरीले आज एक विज्ञप्ती जारी गर्दै आफ्नोबारे भ्रामक र कपोकल्पित कुराहरूको प्रचार भएकोमा ध्यानाकर्षण भएको जनाउँदै जसपा सरकारमा जाने-नजाने पार्टीको निर्णय हुने बताएका हुन् ।

केपी ओली नेतृत्वको सरकारमा जाने विषयमा जसपा र एमालेबीच वार्ता चलिरहेका बेला आफू त्यसमा असहमत रहेको भन्ने किसिमले प्रचार भएकोमा त्यसमा सत्यता नरहेको उनले बताएका छन् ।

चौधरीले सरकारमा जाने या नजाने विषय पार्टीले टुंग्याउने र पार्टीको निर्णय अवज्ञा गर्नेबारे आफूले कल्पनासम्म नगर्ने बताएका छन् ।

‘सरकारमा सहभागी हुने-नहुने निर्णय मेरो एकल प्रयासले सम्भव हुने कुरा पनि होइन,’ उनले भनेका छन्,‘त्यो पार्टीको निर्णय होला । पार्टीले गर्ने निर्णयमा बाधक बन्ने कुराको म कल्पनासमेत गर्न सक्दिनँ ।’

सरकारमा जाने-नजाने विषयमा जसपाभित्र दुई खेमा छ । पूर्व राजपा पक्ष अहिलेको सरकारलाई समर्थन जनाएर जाने पक्षमा छ भने पूर्वसंघीय समाजवादी पार्टी पक्ष त्यसको विरोधमा छ ।