काठमाडौं । नेकपा (एमाले) का अध्यक्ष तथा प्रधानमन्त्री केपी शर्मा ओलीले आफुलाई पदबाट हटाउने भए माओवादी केन्द्रले समर्थन फिर्ता लिनुपर्ने बताउनुभएको छ ।

अध्यक्ष तथा प्रधानमन्त्री ओलीले संसद्मा आफु जस्तोसुकै परिस्थितिको पनि सामना गर्ने भनेर यसअघि पनि भनिसकेकाले हटाउने भए समर्थन फिर्ता लिन अनुरोध गर्नुभएको छ ।

उहाँले जसपाका अध्यक्ष महन्थ ठाकुरलाई प्रधानमन्त्री बनाउँछु भनेर प्रस्ताव नगरेको पनि स्पष्ट पार्नुभएको छ । जनता समाजवादी पार्टी जसपा, नेपालका नेताहरुसँग छलफल तथा संवाद भैरहेको भएपनि आफूले जसपालाई सरकारको नेतृत्व गर्न भनेर कहिल्यैपनि प्रस्ताव नराखेको दावी गर्नुभयो ।

नेपाली कांग्रेसका सभापति शेरबहादुर देउवालाई पनि प्रधानमन्त्री बनाउनेबारे कुनै सहमति नभएको उहाँले प्रष्ट पार्नुभयो ।

पार्टी पुनस्र्थापनापछि कामकारवाही सुरु गर्नुपर्ने भएकाले केन्द्रीय कमिटी बैठकले जिम्मेवारी हेरफेर गरेको उहाँले बताउनुभएको छ ।
ओलीले आफूले पार्टीको बैठक जहाँ बोलायो त्यहाँ सबै नेताहरु आउनुपर्ने बताउनुभयो ।

उहाँले आफूले पार्टीको केन्द्रीय कमिटीको बैठक यही चैत्र ७ गते बोलाएकोले सबैलाई आउन भन्नुभएको छ ।

प्रधानमन्त्री ओलीले नेत्रविक्रम चन्द विप्लवले नेपाललाई हिन्दूराष्ट बनाउनुपर्छ भनेर जनमतसंग्रहको माग गरेको कुरा आफूले नसुनेको बताउनुभएको छ ।

नेपाली रेडियो नेटर्वकको नेपाली बहसमा पत्रकार ऋषि धमलासँग कुरा गर्दै प्रधानमन्त्री ओलीले भन्नुभयोे,“नेपाल धार्मिक स्वतन्त्रता भएको देश हो । नेपाल सबै जातजाति, भाषा, भाषीहरु आस्था र विश्वासहरु भएका समूदायहरु, विभिन्न पेशा व्यवसाय जनताको साझा देश हो । यसलाई विवादको भूमरीमा पार्न खोज्ने, साम्प्रादायिकतामा तान्न खोज्ने, यो कुराहरु उचित होईन ।”